Үҫемлек тамыры ярҙамында һыу табып, иптәштәрен ҡотҡара

Күгәрсен районы хакимиәтендә МХО-ла ҡатнашыусы Рәйес Абдуллин хаҡында һөйләнеләр. Ошо райондың Һатлыҡ ауылынан булған яугир ауыр хәлдә сыҙамлыҡ һәм ҡыйыулыҡ күрһәтә.

Рядовой Абдуллин һәм уның хәрби иптәштәре Украина ҡораллы көстәренең ауыр дроны һөжүменә эләгә. Һөҙөмтәлә бер төркөм Рәсәй хәрбиҙәре бина емереклектәре аҫтында ҡала.

Рәйес Абдуллин, һалҡын ҡанлылыҡ һаҡлап, емерелгән йорттан сығыуҙы ойоштора. Ҡул аҫтындағы саралар ярҙамында хәрбиҙәр бетон стенаны тишеп, тышҡа юл һала. Һыу булмаған шарттарҙа ул уны үҫемлек тамыры ярҙамында табыу ысулын тәҡдим итә, был төркөм көстәрен һаҡлап ҡалырға мөмкинлек бирә.

Сыҡҡандан һуң Рәйес Абдуллин яралы иптәштәрен эвакуациялай, позицияларҙы биләй һәм хәрби бурысын үтәүҙе дауам итә. Уның эшмәкәрлеге арҡаһында төркөм хәрби һәләтен һәм позицияларын һаҡлап ҡала ала.

Был батырлығы өсөн Рәйес Абдуллин IV дәрәжә Изге Георгий ордены менән бүләкләнә. Бынан тыш, рядовойға «Ҡыйыулыҡ өсөн» һәм «Батырлыҡ өсөн» миҙалдары тапшырыла.

Фото: Күгәрсен районы хакимиәте.