БПЛА операторы булыр өсөн студент академик отпуск ала

 “Үҙәк” ғәскәрҙәре төркөмөнөң 27-се гвардия мотоуҡсылар дивизияһы составындағы пилотһыҙ системалар ғәскәрҙәре подразделениеһы хәрбиҙәре Ырымбур өлкәһенең юғары һәм урта һөнәри уҡыу йорттары вәкилдәре, шулай уҡ хәрби-патриотик тәрбиә менән шөғөлләнгән студенттар берләшмәһенең йәмәғәт лидерҙары менән телекүпер үткәрҙе.

Махсус хәрби операцияла ҡатнашыусылар МХО зонаһында хеҙмәт итеүҙәре һәм хәрби бурыстар үтәүҙәре тураһында һөйләне, ысын хәрби эше тарихтары менән уртаҡлашты һәм Рәсәй Оборона министрлығы менән контрактҡа ҡул ҡуйыу үҙенсәлектәрен аңлатты.

Телекүперҙең төп геройы рядовой Инил Солтанов була. Йәш кеше Стәрлетамаҡта колледждың өсөнсө курсында уҡый. Ул академик отпуск ала, Оборона министрлығы менән махсус контракт төҙөй һәм хәҙер FPV-дрон операторы вазифаһында хеҙмәт итә. Дрондар операторы осрашыуҙа ҡатнашыусыларға үҙенең мотивацияһы тураһында һөйләне, илдең оборона ведомствоһы биргән ҡорамалдарҙы һәм экипировкаларҙы күрһәтте, шулай уҡ хәрби-иҫәп һөнәрен үҙләштереү тураһында шәхси тарихтары менән уртаҡлашты.

– Мин механик һөнәренә уҡыным. Әлбиттә, контрактҡа ҡул ҡуйыу теләге тик торғандан килеп сыҡманы. Ҡарар тураһында уйландым. Әсәйемә һәм атайыма нисек әйтергә икән тип уйлай инем. Әле көн һайын улар менән бәйләнешкә инәм, ата-әсәйем мине герой тип атай. Уларға фотолар ебәрәм, улар миңә үҙҙәренекен һала. Улар көн һайын минең эштәрем менән ҡыҙыҡһына, хатта бөгөн нимә ашағаныма тиклем белешә. Бында ашау бик яҡшы, барыһы ла етерлек. Уҡыу үтәбеҙ, иң мөһиме – теорияны белеү. Процент нисбәтендә 80 процент теоретик дәрестәр, ҡалған 20-һе – осоштар. Дрон өлөштәрен, антенналарҙы, тапшырғыстарҙы, пропеллерҙарҙы, рамаларҙы, фюзеляждарҙы, АКБ-ны, прошивкаларҙы, программаларҙы дөйөм алғанда, бөтә базаны өйрәндек. Бик күп мәғлүмәт, уны өйрәнергә һәм иҫтә ҡалдырырға кәрәк. МХО-нан һуң уҡыуымды тамамларға, ғаилә ҡорорға һәм гражданлыҡ эшен дауам итергә теләйем, - тине Инил Солтанов.

Сара үткән Ырымбур өлкәһенең хәрби комиссариатында пилотһыҙ системалар ғәскәрҙәре подразделениеһы командованиеһы вәкиле, Рәсәй Геройы капитан Тельман Уралбаев Рәсәй Ҡораллы Көстәрендә яңы юғары технологиялы ғәскәр төрөнөң көнүҙәклеген һәм кәрәклеген билдәләне.

 – Әле мин ҡыҫҡа ваҡытлы ялда. Ял ваҡытында хәрби комиссариатҡа студенттарға хәрби бәйләнеш һыҙығында ысынбарлыҡта булған мәғлүмәтте һөйләр өсөн килдем. Кешеләр туранан-тура һорауҙар бирә ала: "Ә унда нисек? Ниндәй хәлдәр? Ә был дөрөҫмө?“ Беҙҙең яугирҙәр бөтә һорауҙарға бер нәмә лә йәшермәйенсә яуап бирергә әҙер.

Минең батальоным менән азат иткән Покровскиҙа беҙ тыныс халыҡты осраттыҡ. Улар шатлана, ҡаршы ала, ҡосаҡлай. Неонацистар уларҙы мыҫҡыллаған. Дошман, сигенгәндә, кем булғанын ҡарап тормай ҡала буйлап ата. Шуға күрә пилотһыҙ системалар, беренсе сиратта, штурмовиктарға ут ярҙамы булып тора. Беҙҙең өсөн штурмовиктың иҫән ҡалыуы һәм өйөнә ҡайтыуы мөһим. Бының өсөн беҙгә ут ярҙамын арттырырға һәм яҡшыртырға кәрәк.

Әле пилотһыҙ системалар үҫешә, уның подразделениелары юғары аныҡлыҡтағы һөжүмдәр яһай. Беҙ тыныс халыҡтың арҡаһы артында йәшеренгән, тере ҡалҡан кеүек кешеләр менән йәшеренгән дошман менән һуғышабыҙ. Беҙҙең бурыс – халыҡты азат итеү. Пилотһыҙ аппараттар ярҙамында дошманды асыҡлайбыҙ һәм юҡ итәбеҙ, әммә ябай граждандарҙы һаҡлап ҡалабыҙ, — тине Тельман Уралбаев.

Телекүпер ваҡытында юғары уҡыу йорттары һәм урта махсус уҡыу йорттары вәкилдәре менән бәйләнешкә БПС ғәскәрҙәре батальоны командирының хәрби-сәйәси эштәр буйынса урынбаҫары Салауат Вәлиев сыҡты.

– Беҙ телекүпер ваҡытында пилотһыҙ системаларҙың бурыстарын һәм функцияларын аңлатырға, уның кәрәклеге һәм әһәмиәте тураһында һөйләргә тырыштыҡ. Хеҙмәт шарттарын, йәшәү рәүешебеҙҙе, бурыстарыбыҙҙы аңлауҙары өсөн һөйләнек. Беҙҙә махсус контракт буйынса һайлап алыу үтә, йәғни бер йылға. Беҙҙең батальонда төрлө йәштәге хәрбиҙәр, шул иҫәптән студенттар хеҙмәт итә. Улар араһында программистар ҙа, бындай һөнәрҙәргә ҡағылышы булмағандар ҙа бар. Әммә улар хеҙмәт итергә теләй, ҡыҙыҡһыналар, үҙ оҫталыҡтарын арттырырға ынтылалар. Контракт ваҡыты тамамланғас, хәрби хеҙмәткәр эштән китә. Был ваҡыт эсендә уларға бөтә ярҙам саралары һәм социаль гарантиялар бирелә. Беҙҙә БПЛА операторҙарын башҡа подразделениеларға күсереү ҡәтғи тыйыла. Тыйыу уларҙың күп яҡлы белем алыуы менән бәйле, йәғни улар үҙ өлкәһендә бик кәрәк — тип һөйләне Салауат Вәлиев.

БПЛА подразделениеһында уҡыу ай ярым бара, яңы хәрбиҙәр FPV-дронды йыйыу-тарҡатыуҙы өйрәнә, симуляторҙарҙа күнекмәләр яһай, микросхемаларҙы иретеп-йәбештерергә өйрәнә. Бынан һуң дәрестәр бәләкәй коптерҙар менән дауам итә. Дроноводтар осорға һәм ултырырға өйрәнә. Был хаҡта БПЛА расчеты начальнигы Андрей Горбунов һөйләне.

– Быларҙың барыһынан һуң ысын FPV-дрондар менән эшләүгә күсәбеҙ. Осабыҙ, ҡатып ҡалабыҙ. Яй осорға кәрәк. Тиҙ осорға бөтәһе лә һәләтле. Ә беҙгә ашыҡмай осоу мөһим. Дошманға әкрен генә яҡынлашырға, уның ҡайҙа йәшеренгәнен асыҡларға һәм юҡ итергә кәрәк. Бынан тыш, штурмовиктарға кәрәкле әйберҙәрҙе — аҙыҡ-түлек, һыу, дарыуҙар һәм башҡа әйберҙәрҙе килтерергә кәрәк. Оператор нөктәне белә, осоп килә, коптерҙы ултырта, посылканы төшөрә һәм кире осоп китә. Мин үҙем FPV-дрон менән эшләүҙе ай ярымдан ашыу ваҡыт эсендә өйрәндем. Быға тиклем танкист-механик-водитель инем. 2022 йылдан алып МХО зонаһында хеҙмәт итәм. Сватово, Кременная, Авдеевка һәм Покров йүнәлеше өсөн хәрби операцияларҙа ҡатнаштым, — тине Андрей Горбунов.

ИҒТИБАР!

* Пилотһыҙ система ғәскәрҙәрендә хеҙмәт итеүселәр – юғары класлы, яҡшы әҙерлекле, автомат менән түгел, ә джойстик менән оҫта идара итеүсе яугирҙәр. Шуға күрә улар өсөн айырым шарттар булдырыла һәм унда урындар һаны ла сикләнгән.

* Был контрактсыларға башҡа яугирҙәргә тәғәйен кеүек үк түләүҙәр, льготалар, социаль гарантиялар ҡаралған, ләкин улар өсөн айырым өҫтөнлөктәр ҙә бар.

* Хеҙмәт хәүефһеҙерәк, сөнки хәрби бәрелеш һыҙығынан алыҫта үтә.

* Контракт бер йылдан алып билдәләнгән ваҡытҡа төҙөлә. Ул тамамланғас, хеҙмәттән китергә йәки яңыһын төҙөргә мөмкин.

* Контрактта хәрби хеҙмәткәрҙе уның ризалығынан тыш пилотһыҙ осоу аппараттарына идара итеүгә бәйле булмаған башҡа һөнәргә йәки икенсе ғәскәр төрөнә күсерергә ярамағанлығы яҙыла.

* Студенттар, академик отпуск алып, контракт төҙөй ала. Хеҙмәте тамамланғас, бюджет нигеҙендә (урындар булған осраҡта) уҡыуын дауам итергә хоҡуҡлы.

* Һөҙөмтәлелек өсөн өҫтәмә. Дошмандың техникаһын, ҡорамалдарын уңышлы юҡ иткән кешеләргә 50000 – 500000 һум өҫтәмә түләү ҡаралған.

* Рәсәй граждандары булған ир-егеттәр генә контракт төҙөй ала. Яңы подразделениеларҙа ҡатын-ҡыҙҙар өсөн хәрби-иҫәп белгеслектәре әлегә ҡаралмаған.

* FPV-дрон операторы булыу өсөн йәш буйынса талап – 18 йәштән 35 йәшкәсә, ә башҡа белгестәр өсөн – 18 – 45 йәш.

* Физик яҡтан үҫешкән булыу һәм һаулыҡ торошо буйынса хәрби хеҙмәткә яраҡлылыҡ.

* Туғыҙ кластан да кәм булмаған белемдең булыуы мотлаҡ.

* Ауыр һәм айырыуса ауыр енәйәттәр өсөн хөкөм ителмәгән булыу шарт. Башҡа төрлө суд ҡарарҙары осрағында ҡарар һәр кемгә ҡарата шәхсән рәүештә ҡабул ителә.

Ҡайҙа мөрәжәғәт итергә?

Үҙең йәшәгән урын буйынса хәрби комиссариатҡа.

Контракт буйынса хәрби хеҙмәткә һайлап алыу пунктына (Өфө ҡалаһы, Революция урамы, 156).

“Дәүләт хеҙмәттәре”ндә заявка ҡалдырырға мөмкин.

БПЛА ғәскәрҙәрендә хеҙмәт итеү тураһында бөтә мәғлүмәтте башбат.рф сайтында һәм, 122 һандарын йыйып, телефон аша алырға мөмкин.