Ҡолғонаға тиклем юлға асфальт ҡасан түшәлер?

Тиҫтә йыл элегерәк ауыр йөк машиналары иҙгән Маҡарҙан Ҡолғонаға илткән юлды икенсе ерҙән һала башланылар. Шунан бер нисә йыл юл төҙөкләндереү эштәре туҡталып ҡалды.

Ниһайәт, былтырҙан “Хәүефһеҙ сифатлы юлдар”  милли проекты сиктәрендә Маҡарҙан Ҡолғона яғына асфальт түшәй башланылар.

Был эштәрҙе башҡарған “Дортранстрой” яуаплылығы йәмғиәте төҙөүселәре төпкөлдә йәшәгән ауыл халҡының шатлығын үҙҙәренекеләй ҡабул итә. “Былтыр һигеҙ километрға яҡын юл һалдыҡ, быйыл да асфальт түшәүҙе дауам итәбеҙ. Ҡайһы бер урындарҙа юлдар киңәйтеләсәк”, – ти подрядсы ойошманың төҙөлөш-монтажлау эштәре мастеры Динар Ғиләжев. Бригадалаға үҙ эшен яратып башҡарған тәжрибәле юлсылар тупланған. Мәҫәлән, сығышы менән Бөрйән районынан булған Әмин Сатвалов ун өс йыл юл һалыу эшендә.

Бар уңайлыҡтары булған вагон-ҡаласыҡта йәшәгән, вахта ысулы менән эшләгән юлсылар хеҙмәт шарттары менән бик риза. “Маҡар ауылында “Күк Ҡарауыҡ” кафеһында өс тапҡыр тәмле һәм туҡлыҡлы итеп ашаталар”, - ти Илсур Исхаҡов, Эмиль Фәизов, Илгиз Хәлимов, Ришат Әблиевтәр.

Белорет ҡалаһына тиклем асфальт юлдар һалынһа, ауыл халҡы ғына түгел, был яҡҡа сәйәхәт итергә яратҡан туристар ҙа еңел тын алып ҡуйыр ине.