Йәнә сүп-сар ташыу хаҡында...

Көн тәртибендәге беренсе мәсьәлә ҡаты коммуналь ҡалдыҡтар менән эш итеү өлкәһендәге төбәк операторҙарының эш сифатына ҡағылды. Тәбиғәттән файҙаланыу һәм экология министрлығы сүп-сарҙы ситкә ташыуҙың раҫланған графиктарының үтәлешен көн һайын тикшерә. Мәҫәлән, төбәк операторы – “Дүртөйлөмелиоводстрой” йәмғиәтенең эшенә ентекле анализ яһалды.

Шулай уҡ “ТКО-Башҡортостан” автоматлаштырылған системаһын дәүләт мәғлүмәт системаһы статусына күсереү буйынса фекер алыштылар.

Халыҡтың ҡаты коммуналь ҡалдыҡтарҙы ташыу мәсьәләһе буйынса социаль селтәрҙәге мөрәжәғәттәренә анализ күрһәтеүенсә, 13-19 февралдә “Инцидент” системаһына 60 мөрәжәғәт килгән, шул уҡ ваҡытта 5-12 февралдә уларҙың һаны 13 булған, йәғни 47-гә артҡан.

Андрей Назаровтың ҡарары буйынса бөгөн Өфөлә сүп-сар йыйыу урындары буйлап рейд ойошторолдо. Ошондай уҡ сараларҙы Премьер-министр муниципалитет башлыҡтарына ла үткәрергә ҡушты. Рейд йомғаҡтары киләһе дүшәмбе ҡалдыҡтар темаһы буйынса кәңәшмәлә ҡарала. Андрей Назаров әйтеүенсә, бындай контроль рейдтары даими уҙғарыласаҡ.

– Бынан ары төбәк операторҙарының эшенә контроль көсәйтелә. Дүрт операторҙың өсәүһенә сүп-сарҙы ташыған өсөн хаҡты арттырырға рөхсәт ителде. Шуға күрә улар эште сифатлы башҡарырға, контейнер майҙансыҡтарын тәртиптә тоторға, ҡалдыҡтарҙы ташыу графигын теүәл үтәргә тейеш, – тине ул.

Фото: pravitelstvorb.ru