Һәр кем йәшәү өсөн көрәшә. Хатта ағастар ҙа

Хәтерләһәгеҙ, былтыр Баймаҡ районында көслө урман янғындары булды. Күмәк көс менән һүндерелгән ут байтаҡ урмандарҙы, сабынлыҡ-көтөүлектәрҙе ялмап алырға өлгөрҙө. Күптәр янғын булған тау битләүҙәре, юл буйындағы урмандар ҡап-ҡара булып яталыр тип уйлаһа, тәрән яңылыша. Тәбиғәттең мөғжизәһенә хайран ҡалырлыҡ бит ул: янған урындарҙа йәп-йәшел булып үләндәр морон төрткән, ә инде яртылаш янған ағастарҙың йәшәү өсөн көрәшеүен күреп, хатта иларлыҡ та... Бер яғы утта янып һарғайып ултырһа, икенсе яғынан йәшәүгә ынтылыш алып, ниндәйҙер ҡөҙрәт көсө менән йәп-йәшел генә япраҡтар күренә, ҡайындар бөрөләнә башлаған. Ә эргәләрендә - умырзаялар сәскә ата. Иҫ киткес мөғжизәле матурлыҡты фотоға төшөрмәйенсә булдыра алманым. Ысынлап та һәр йән эйәһе йәшәү өсөн көрәшә, шул иҫәптән ағастар ҙа икән...

Автор фотолары.