Ял көндәрендә һауа торошо ниндәй була?

Республикала алдағы ял көндәре ҡарлы була, тип фаразлай Башҡортостандың гидрометеорология үҙәге синоптиктары. Бөгөн, 16 декабрҙә, урыны менән бер аҙ яуым-төшөм көтөлә. Ел көньяҡ-көнсығыштан, көньяҡтан талғын. Һауа температураһы көндөҙ -7, -12 градус.

Иртәгә, 17 декабрҙә, ҡар, айырым райондарҙа боҙлауыҡ көтөлә. Ел көньяҡ-көнсығыштан, көньяҡтан талғын, урыны менән киҫкен. Төндә -8, -13, көнсығышта -18 градусҡаса һыуыта, көндөҙ -3, -8 градус булыуы көтөлә.

Йәкшәмбе, 18 декабрҙә, яуым-төшөм күбәйә. Көндөҙ епшек, урыны менән көслө ҡар яуыуы фаразлана. Айырым райондарҙа буран, боҙлауыҡ, сымдарға һәм ағастарға епшек ҡар һырый, юлдарҙа көрт. Һауа температураһы төндә -5, -10, көньяҡ-көнсығышта -15-кә тиклем, көндөҙ 0, -5 градус.

Көндәрҙең кинәт боҙолоуын иҫәпкә алып, оҙон юлға сығыусы водителдәргә һаҡ булырға кәңәш итәбеҙ, тиҙлек режимын арттырмағыҙ, үҙегеҙҙе һәм яҡындарығыҙҙы һаҡлағыҙ!