Йәмәғәт инспекторҙары, конкурста ҡатнашығыҙ

Башҡортостанда иң яҡшы йәмәғәт инспекторҙарын асыҡлауға һәм дәртләндереүгә, уларҙың һөнәри оҫталығын күтәреүгә һәм тирә-яҡ мөхитте һаҡлау өлкәһендә ыңғай эш тәжрибәһен таратыуға йүнәлтелгән “Башҡортостан Республикаһының тирә-яҡ мөхитте һаҡлау буйынса иң яҡшы йәмәғәт инспекторы” конкурсы старт алды.

– “Тирә-яҡ мөхитте һаҡлау тураһында”ғы федераль закон буйынса йәмәғәт инспекторҙарының хоҡуҡтарын һәм бурыстарын киңәйтеү ҡаралған. Уларҙың тирә-яҡ мөхитте һаҡлау буйынса хоҡуҡтары, дәүләт контроле органдары менән үҙ-ара эш итеү тәртибе билдәләнгән. Быйыл Башҡортостанда 2025 йылда йәмәғәт экология инспекторҙарының экология өлкәһендәге боҙоуҙарҙы асыҡлау осраҡтары булмауын белдем. Төп сәбәп – улар тәбиғәтте һаҡлау ҡануниәтен боҙоуҙарҙы асыҡлау ысулдарын, уларҙы нисек теркәргә һәм ҡайҙа тапшырырға белмәй. Был хәлде төҙәтеү һәм кешеләрҙе тәбиғәтте һаҡлауға йәлеп итеү өсөн беҙ Талҡаҫ күлен һаҡлау буйынса проект башланыҡ, уның сиктәрендә 200-гә яҡын йәмәғәт экология инспекторы уҡытылды. Конкурс Башҡортостандың тәбиғәтен һаҡлау менән ҡыҙыҡһынған граждандарҙың әүҙем берләшмәһен булдырыуға булышлыҡ итәсәк. Был экологик мәҙәниәт кимәлен күтәреү генә түгел, ә йәмәғәт инспекторҙарының эшен республика экологияһы өсөн һөҙөмтәлерәк һәм файҙалыраҡ итәсәк, – тип белдерҙе “Ирҙәр ҡоры” төбәк йәмәғәт ойошмаһы рәйесе, Рәсәй Федерацияһы Дәүләт Думаһы депутаты Зариф Байғусҡаров.

Башҡортостан Республикаһында йәшәгән һәм Тәбиғәттән файҙаланыу өлкәһендә күҙәтеү буйынса федераль хеҙмәттең Көньяҡ Урал төбәк‑ара идаралығының Тирә-яҡ мөхитте һаҡлау буйынса йәмәғәт инспекторҙары реестрына индерелгән йәмәғәт инспекторҙары ҡатнаша ала.

Ҡатнашыусыларға ғаризаны һәм конкурс материалдарын электрон төрҙә почтаға konkursinspektora@yandex.ru 2026 йылдың 15 авгусына тиклем ебәрергә кәрәк.

Эксперт жюриһы конкурс эштәрен 15 сентябргә тиклем ҡарай, ә еңеүселәрҙе бүләкләү тантанаһы сентябрҙең аҙағында үтә. Еңеүселәрҙе һайлағанда тәбиғәтте һаҡлау ҡануниәтен боҙоу осраҡтары, әҙерләнгән материалдар буйынса яуаплылыҡҡа тарттырылғандар, йәмәғәт инспекторының дәүләт органдары менән берлектәге сараларҙа ҡатнашыуы һәм башҡа критерийҙар иҫәпкә алынасаҡ. Конкурсты ойоштороусылар булып Башҡортостан Республикаһы Башлығы гранттары фонды, Тәбиғәттән файҙаланыу өлкәһендә күҙәтеү буйынса федераль хеҙмәттең Көньяҡ Урал төбәк-ара идаралығы, Башҡортостандың Тәбиғәттән файҙаланыу һәм экология министрлығы һәм Башҡортостндың Урман хужалығы министрлығы булышлығында Башҡортостан Республикаһының “Ирҙәр советы” йәмәғәт ойошмаһы сығыш яһай.

Тулыраҡ мәғлүмәтте конкурс положениеһында алырға мөмкин https://vk.com/wall-202441032_4513

Фото: Зариф Байғусҡаровтың матбуғат хеҙмәтенән.