Бөтә яңылыҡтар
Эшҡыуар
1 Апрель 2019, 15:13

Эшҡыуар имтихан бирмәй...

Шулай итеп, республиканың һәр бер районы һәм ҡалаһында “Инвестиция сәғәте” үткәрелә башланы. Тәүге һөҙөмтәләр бар: дөйөм суммаһы 7,4 миллиард һум тәшкил иткән барлығы 131 проект ҡаралған.

Шулай итеп, республиканың һәр бер районы һәм ҡалаһында “Инвестиция сәғәте” үткәрелә башланы. Тәүге һөҙөмтәләр бар: дөйөм суммаһы 7,4 миллиард һум тәшкил иткән барлығы 131 проект ҡаралған. Ике проект республика “Инвестиция сәғәте”нә сығарылған.
Был турала Хөкүмәттәге оператив кәңәшмәлә Эшҡыуарлыҡ һәм туризм буйынса дәүләт комитеты рәйесе вазифаһын башҡарыусы Римма Бойцова әйтте.
– Проблемалар “хәҙер һәм ошонда” хәл ителергә тейеш. Эшҡыуарҙар һынау тоторға килмәй, осрашыу уларҙан имтихан алған кеүек үткәрелмәһен. Инвесторҙарҙы берәмләп саҡырығыҙ, улар коммерция серен башҡалар алдында асмаһын, – тине Римма Бойцова. – Мәсьәлә мөмкин булғанса бер осрашыуҙа хәл ителһен, хеҙмәткәрҙәрегеҙгә аныҡ бурыстар ҡуйығыҙ. Дәүләт ярҙамы төрҙәре тураһында шунда уҡ яуап бирегеҙ, “сайттан ҡарарға” ҡушмағыҙ.
Ул шулай уҡ эшҡыуарҙарҙы ла бындай осрашыуҙарға мөмкин булғанса әҙер, аныҡ “стартап”тар менән килергә саҡырҙы.
Башҡортостан Башлығы вазифаһын ваҡытлыса башҡарыусы Радий Хәбиров уға өҫтәп, инвесторҙарға хөрмәт менән ҡарарға, сиратта көттөрөп ултыртмаҫҡа ҡушты. Һәр кемде аныҡ ваҡытҡа саҡырырға кәрәклеген әйтте. Шулай уҡ Радий Фәрит улы һәр муниципалитетта “Инвестиция сәғәте”н үткәреү өсөн яуаплы хакимиәт хеҙмәткәрен билдәләргә ҡушты. Ә дәүләт комитетына һәр ошондай ултырыштың ҡарарын тормошҡа ашырыуҙы ныҡлы контролдә тотоу бурысы йөкмәтелде.
Әлфиә МИНҒӘЛИЕВА.
Фото: newsbash.ru