Булдыҡлыны заман үҙ итә

Колхоз-совхоздар тарала. Ауылда ең һыҙғанып эшләү дәрте менән янған Ришатҡа ҡалалағы бер пред­приятиеға урынлашырға тура килә. Унда бер ни тиклем эшләп ала ла ар­мия хеҙмәтенә юллана. Ил ал­дын­дағы бурысын үтәп ҡайтҡас, шаҡ­тай ваҡыт күңеленә ятҡан шөғөл эҙләй.

Үҙен сауҙа өлкәһендә лә һынап ҡарай. Сауҙа предприятиеларында менеджер булып эшләү киләсәге өсөн бик тә файҙалы була. Был даирәлә ярайһы ғына тәжрибә туплағас, Ришат Нәзим улы үҙен эшҡыуарлыҡта һынап ҡарарға була. Бер нисә сауҙа нөктәһе аса. Ҡатыны Гөлназ Йәүҙәт ҡыҙы төп кәңәшсеһе, ярҙамсыһы була. Әйт­кәндәй, ул һөнәре буйынса химик, юғары уҡыу йортон тамам­лағас, байтаҡ йылдар заводта эшләй.

Ғәлиевтәр төрлө тауарҙар менән сауҙа итеп ҡарайҙар. Бары тик ислам дине тауарҙары һатыуҙы ойош­торғас ҡына, эске бер ҡәнә­ғәтләнеү тойғоһо кисерәләр. Был, бәлки, шуның менән дә аңлаты­ла­лыр: Ришат та, Гөлназ да дини мөхиттә үҫкән. Ике яҡтан да нә­ҫел­дәрендә элек-электән дин­дарҙар күп булған. Ата-әсәләре лә иманлы кешеләр. Әйткәндәй, Ри­шаттың бер ағаһы мәсеттә имам-хатиб булып эшләй. Ришат менән Гөлназ да үҙҙәренең рухи ихтыяжы буйынса дин тота башлай. Бөгөн дә улар үҙҙәренең булмышына тоғро.

Маҡсатҡа ынтылышлы, үҙ көсө­нә ышанған кеше һис ҡасан өлгә­шелгәндәр менән генә ҡәнәғәт­ләнеп ҡалмай. Был һүҙҙәр – Ғәлиевтәр хаҡында. Бер нисә йыл элек улар эшҡыуарлыҡ йүнәлешен үҙгәртергә ҡарар итә – перәник етештереүҙе үҙләште­рәләр. Арен­даға алған бинала ҙур булмаған цех йыһазлайҙар. Тәүҙә дүрт кеше менән эш башлайҙар. Тәүлегенә дүрт йөҙ килограмм самаһы продукция эшләп сыға­ралар. Әлбиттә, технология серҙә­ренә төшөнөп, эште тейешенсә яйға һалғансы ҙур тырышлыҡ һәм ныҡышмалылыҡ кәрәк була.

Продукцияны башта үҙҙәре йәшәгән Стәрле­тамаҡ ҡалаһы һәм районындағы сауҙа нөктәләренә сығаралар. Ул сауҙа баҙарында тиҙ танылыу таба һәм ҙур һорау менән файҙалана, шуға производствоны киңәйтеү ихтыяжы тыуа. Ғәлиевтәр ошо маҡ­сатта бер бина һатып ала. Уны заманса предприятие итеп үҙгәртеп ҡороу өсөн ҙур тырышлыҡ һәм сығымдар кәрәк була. Был йәһәттән уларға ата-әсәләре, туғандары, ғаилә дуҫтары ярҙам итә.

300 квадрат метр майҙанды би­ләгән бинала уңайлы эш шарттары тыуҙырыла. Цехҡа заманса технологик йыһаздар урынлашты­ра­лар. Яңы эш урындары барлыҡ­ҡа килә. Етештереү күләмен күпкә арттырыу мөмкинлеге тыуа. Әммә улар күләм артынан ғына ҡыумай, продукция сифатын алғы планға ҡуя. Бул­дыҡлы эшҡыуарҙар тәүге көндән үк үҙҙәре етештергән перә­ник­те экологик яҡтан таҙа, шул уҡ ва­ҡытта башҡа етештереү­селәр­ҙе­кенән тәмлерәк итеү маҡ­сатын ҡуя.

Хәҙер был төр продукцияны етеш­тереүселәр күп, конкурентлыҡ көслө. Сауҙала уның ниндәй генә сорттары юҡ! Әммә “ИП Ғәлиев Р.Н.” маркаһы менән етештерелгән тәмле, татлы, ҡабарып торған матур формалы перәниктәрҙе бер тапҡыр тәмләп ҡараған һатып алыу­сы артабан мотлаҡ уға өҫ­төнлөк бирәсәк. Продукция үҙенең юғары сифаты менән алдыра. Әйтәйек, Ғәлиевтәр перәник етеш­тереүҙә ондоң юғары сифат­лыһын ғына ҡуллана, ҡамыр иҙеү өсөн һөттө фермер хужалыҡта­рынан алалар. Тәбиғи сеймалдан әҙер­ләнгән ҡамырға һәр төрлө тәм көсәйткес­тәрҙе ҡушыуҙы кәрәк тапмайҙар. Ә тәбиғи тәм үҙгәр­мәйенсә сифатын оҙаҡ һаҡлай.

Йәнә шуны әйтәйек, цехта ҡа­мыр эштәре ҡулдан башҡарыла. Коллективта кондитер ризыҡтары етештереүҙә тәжрибәле хеҙмәт­кәрҙәр – үҙ эшенең ысын оҫталары тупланған. Арала технолог Нәүрүз Мирзаев, водитель-экспедитор Рус­лан Зөбәйеров кеүек производство ойошторолған көндән башлап эшләүселәр бар.

Йәнә шуны ныҡлы ышаныс менән әйтергә мөмкин: Ғәлиевтәр предприятиеһында етештерелгән продукцияның ҡулланыусылар баҙарында үҙ йөҙө, урыны бар. Әле­ге ваҡытта “Молочный”, “Мятный”, “Шоколадный” сортлы перә­ник­тәр етештерәләр. Продукция Өфө, Стәрлетамаҡ, Октябрьский, Нефтекама, Магнитогорск, Силәбе, Екатеринбург, Мейәс ҡалаларына оҙатыла һәм сауҙа кәштәләрендә оҙаҡ ятмай. 2016 йылдан башлап продукцияның “Башҡортостан продукты” билдәһе менән эшләп сыға­рылыуы айырыуса әһәмиәткә эйә. Ә “Молочный” сортлы перәник “Наш бренд” продукттар фестива­лендә беренсе дәрәжә диплом ме­нән бүләкләнгән. Был предприя­тие­ның эшмәкәр­легенә республика кимә­лен­дә­ге юғары баһа булып тора.

Гөлназ менән Ришат Ғәлиевтәр киләсәккә ҡарап йәшәй. Ассортиментты байытыу тураһында хәс­тәрлек күрелә. Етештереүҙе киңәй­теп, коржик бешереү өсөн әҙер­лек эштәре бара. Уның техноло­гияһы тулыһынса үҙләштерелгән.

Эшҡыуарҙар хеҙмәттә лә, ғаи­ләлә лә булдыҡлылыҡ өлгөһө күрһәтә. Тормоштары гөрләп тора, заманса матур итеп йорт һалып кер­гән­дәр. Ғәлиевтәр ике бала тәр­биә­ләп үҫтерә. Балалары ата-әсә үрнәгендә тырыш, эшһөйәр булып үҫә. Ҡыҙҙары Азалия Ҡазанда университетта белем ала, табип була­саҡ. Улдары Дамир мәктәптә уҡый, сит телдәрҙе өйрәнеүҙә матур уңыштары бар.

Уңған, өлгөлө ғаилә үҙ хәстәр­лек­тәре менән генә йәшәмәй. Мәсет­тәргә, балалар йортона, балалар баҡсаларына хәйриә ярҙамы ла күрһәтә.

Әлбиттә, уңыштар еңел генә яуланмай. Бөгөнгө һатып алыусының талаптарына һәм ихтыяжына тура килгән продукция етештереп кенә юғары һөҙөмтәгә өлгәшеп була.

Эшҡыуар Ришат Ғәлиевтең эш­мәкәрлеге быға миҫал булып тора. Ришат Нәзим улы өлгәшел­гән­дәр­ҙән ҡәнәғәтлек тойған бер ва­ҡытта, үҙебеҙҙең аҙыҡ-түлек етеш­тереү­селәргә республикала “йәшел юл”­ды киңерәк асырға кәрәк тигән те­ләктә ҡала. Эйе, Ғәлиевтәр етеш­тер­гән кеүек юғары сифатлы продукция бигерәк тә бөгөн – сит ил та­уарҙарын Ватаныбыҙҙа етеш­терелгәненә алмаштырыу осоронда супермаркеттарҙа лайыҡлы урын алып торорға тейеш.