+16 °С
Дождь
Эшҡыуар
18 Февраля 2020, 09:15
Күмерҙең файҙаһын күреп...
Шәхси эшҡыуар Алина Хәмәтшинаның Абыҙ ауылында урынлашҡан күмер етештереү заводында, ҡыш булыуға ҡарамаҫтан, эш бер минутҡа ла туҡтамай. Хеҙмәткәрҙәр әле Рәсәйҙең ҙур ғына бер күмәртәләп һатыу-сауҙа ойошмаһына күмер хәстәрләй. Бынан тыш, республика райондарынан да эшҡыуарҙар әҙер продукцияны күмәртәләп һатып ала. “Урамда ҡыш булһа ла, ит ҡыҙҙырып ашаусылар һаны кәмемәй, хәҙер халыҡ мәҙәни ялды хуп күрә бит. Шуға ла беҙҙең продукцияға ихтыяж бар, булды һәм артабан да шулай буласаҡ”, – ти директор вазифаһын башҡарыусы Александр Хәмәтшин.
Шәхси эшҡыуар Алина Хәмәтшинаның Абыҙ ауылында урынлашҡан күмер етештереү заводында, ҡыш булыуға ҡарамаҫтан, эш бер минутҡа ла туҡтамай. Хеҙмәткәрҙәр әле Рәсәйҙең ҙур ғына бер күмәртәләп һатыу-сауҙа ойошмаһына күмер хәстәрләй. Бынан тыш, республика райондарынан да эшҡыуарҙар әҙер продукцияны күмәртәләп һатып ала. “Урамда ҡыш булһа ла, ит ҡыҙҙырып ашаусылар һаны кәмемәй, хәҙер халыҡ мәҙәни ялды хуп күрә бит. Шуға ла беҙҙең продукцияға ихтыяж бар, булды һәм артабан да шулай буласаҡ”, – ти директор вазифаһын башҡарыусы Александр Хәмәтшин.
Алина Альберт ҡыҙы менән Александр Олегович Хәмәтшиндар районда күмер етештереүгә бынан бер нисә йыл элек кенә тотона. Алинаның атаһы Абыҙ ауылындағы заводты 2016 йылда һатып ала, бер аҙ үҙе етәкселек итә. Әммә аҙаҡ ҡыҙы-кейәүе менән кәңәшләшеп: “Һеҙ йәштәр, әйҙәгеҙ, үҙегеҙ тырышығыҙ. Эште дауам итеү өсөн бөтә мөмкинлектәр етерлек, кәрәк булһа, тел ярҙамы күрһәтермен”, – тип эшмәкәрлеген йәштәр ҡулына тапшыра. Әлбиттә, уларға тәүге осорҙа был кәсеп ауыр кеүек тойолһа ла, тора-бара күмер етештереү нескәлегенә, халыҡ менән эшләргә тиҙ арала өйрәнәләр.
Тиҙҙән Хәмәтшиндарҙы Башҡортостан Республикаһы буйынса Ҡариҙел урман етештереүселәр берлегенә инергә саҡыралар. Улар был тәҡдимдән баш тартмай, ҙур ихласлыҡ менән берлеккә инеп, матур ғына эшләп алып китәләр.
Бөгөн бында һигеҙ кеше эш урыны тапҡан, хеҙмәт шарттары яҡшы ойошторолғанғамы, эш хаҡы юғары булғанғамы, хатта күрше ауылдарҙан да эш һорап килеүселәр бар икән. Предприятие Ҡариҙел районында ҡуртымға биш диләнкә алып, әле шунда күмер өсөн ағас етештерә. Урманды ҡырҡыу, ташыу, сығарыу өсөн ҡеүәтле йөк машиналары, тракторҙар һәм башҡа заманса ҡоролмалар һатып алғандар.
– Эшмәкәрлегебеҙҙе алып барыу өсөн уңайлы шарттар бар. Шөкөр, бынан тыш күмер етештереү нескәлектәрен яҡшы аңлаған оҫталар беҙҙә йыйылған, – ти Александр Хәмәтшин. – Эштән китеүселәр юҡ, күптәрҙе хеҙмәт хаҡы тота, мәҫәлән, әле 20–25 мең һум тәшкил итә, ҡыҙыу мәлдә иһә 30 меңдән аша.
Әҙер продукцияны һатыу бында яҡшы ойошторолған, күмәртәләп һатып алыусылар менән уңайлы килешеүҙәр төҙөлгән. Бөгөн Хәмәтшиндарҙың күмерен, Өфө, Нефтекама, Стәрлетамаҡ, Октябрьский ҡалаларынан тыш, күрше райондар ҙа яратып һатып ала. Мәскәүҙәр ҙә эшҡыуарҙарҙың күмеренә өҫтөнлөк биреп, йыш ҡына күпләп заказ ебәрәләр.
Ҡариҙел төбәгендә етештерелгән күмерҙе, нигеҙҙә, ресторан-кафелар, гриль-барҙар, шашлыҡ бешереүселәр ҙур теләк менән ала.
– Беҙҙең продукция сифаты менән яҡшы, ҡайһы бер етештереүселәр, аҡса артынан ҡыуып, сифатына иғтибар итмәй. Ҡулланыусылар йыш ҡына онталып, тиҙ янып бармағанлығын билдәләйҙәр ундай намыҫһыҙ эшҡыуарҙарҙың продукцияһын, – ти Александр Олегович. – Беҙ бөгөн күмер етештереүҙә заманса ҡорамалдар ҡулланып, яңы алымдар менән эш итәбеҙ. Һаман да, баҙарҙы өйрәнеп, халыҡтың ихтыяжын иҫәпкә алып эшләргә тырышабыҙ.
Күмер өсөн ҡайын ағасын ғына ҡулланалар. Етәкселек тиҙҙән күмер тултырылған ҡапсыҡ эсенә туҙ һалып та һатыуға сығармаҡсы. “Был, әлбиттә, отошло булмаҡсы, сөнки магазиндарҙа һатылған ут яндырғыстар күпкә хәүефле бит. Ана, күпме кеше шул яндырғыстар арҡаһында зыян күрә, хатта күҙһеҙ ҡала”, – ти алдынғы ҡарашлы эшҡыуарҙар.
Хәмәтшиндарҙың эшмәкәрлеге бөгөн күптәргә өлгө булырлыҡ, уларҙың эш тәжрибәһен өйрәнергә тип хатта сит өлкәләрҙән дә киләләр. “Хәлебеҙҙән килгәнсә ярҙам итергә тырышабыҙ. Беҙгә лә ваҡытында ошо өлкәлә эшмәкәрлек алып барыусылар ҙур ярҙам итте бит”, – ти улар. Йәштәрҙең тырышлығы бушҡа китмәҫ, моғайын, сөнки уларҙың эшкә дәрте ташып тора.
Айрат Нурмөхәмәтов фотоһы.
