Үҙебеҙҙең билмән телде йоторлоҡ!

Әлбиттә, был шөғөлгә тотон­ғансы, Гөлгөнә Мөхәмәтйәр ҡыҙы үҙен эшҡыуарлыҡтың төрлө тармаҡтарында һынап ҡарай: фатир ҙа ремонтлай, баҙарҙа кейем дә һата, ауыл хужа­лығында ла көсөн һынай. Шулай уҡ шәхси хужалыҡ­тарҙан мал һатып алып, Белорет ҡалаһының Үҙәк баҙарында сауҙа итә. Тора-бара баҙарҙа үҙенең сауҙа нөктәһен аса, мал йыйыу буйынса ла даими бәйләнештәр булдыра.

Эшҡыуарлыҡ менән шөғөл­ләнәм тигән кеше һәр аҙымын алдан уйлап баҫырға тейеш. Ит һатыу менән генә әллә ни алға китеп булмаҫын аңлаған Гөл­гөнә Мөхәмәтйәр ҡыҙы тултырма, ҡаҙылыҡ кеүек ит ризыҡ­тары әҙерләп, һатыуға сығарып ҡарарға баҙнат итә. Һәм яңы­лыш­май, милли ризыҡ­тары­быҙға ихтыяж ҙур. Ул эшен тағы ла киңәйтеп, ҡаланың Үҙәк ба­ҙарының бер бүлмәһендә иттән ярымфабрикаттар етештереү цехы аса. Улар етештергән “Мосолман”, “Себер”, “Ҡабымлыҡ”, “Буйҙаҡтар”, сало-картуф, кәбеҫтә билмәндәре, ҡаҙылыҡ, тултырма, манты, кәтлит, фрикаделька, хинкали, голубцы, тултырылған борос һәм башҡа төр ит ризыҡтарын халыҡ яратып һатып ала. Уның эшмә­кәрлеге ҡала янындағы ауылдар өсөн дә отошло, сөнки улар эш­ҡыуарҙы ит менән тәьмин итә.

Цех махсус заказдар буйынса ла эшләй. “Бадалов продукты” исеме аҫтында етештерелгән ярымфабрикаттар Белоретта ғына түгел, Өфөнөң “Родное село” сауҙа нөктәләренә лә һа­тыуға сығарыла. Предприятие күрше Әбйәлил, Бөрйән райондары сауҙа нөк­тәләре менән дә хеҙмәттәшлек итә, шулай уҡ республиканың башҡа райондарын һәм ҡалаларын сифатлы ризыҡ менән тәьмин итергә әҙер.

Гөлгөнә Бадалова бөгөнгө көн менән генә йәшәргә өйрәнмәгән, шуға ла эшҡыуарлыҡты үҫте­реүгә арналған сараларҙа, семи­нарҙарҙа уны йыш күрергә мөм­кин. Ҡатындың киләсәктә ошо йүнәлештә етештереү эшен үҫте­реү буйынса хыялдары ҙур. Тын­ғыһыҙ ханымды бер урында осратырмын тимә, әле етеш­тереү цехында булһа, бер нисә минуттан һатыу кибетендә йүгереп йөрөй йә автомобилгә ултырып, хужалыҡ эштәрен көйләргә сығып китә. Күрше райондарға заказдар ташырға ла үҙе өлгөрә.

Эшҡыуарлыҡ кешенең ҡа­нында булалыр ул. Гөлгөнә ха­нымдың эшмәкәрлегенә ҡара­йым да шундай уй тыуа. Уның Белорет ҡалаһының Үҙәк баҙа­рының өсөнсө ҡатында кафе асырға батырсылыҡ итеүе лә ошо хаҡта һөйләй. Унда ит ризыҡтарын тәмләп ҡарарға ла, һатып алырға ла мөмкин. Туҡ­ланыу, аҙыҡ-түлек менән сауҙа итеү ҙур яуаплылыҡ талап итә, шуға ла һәр саҡ уяу булырға кә­рәк. Шулай булыуға ҡара­маҫтан, Гөлгөнә Бадалова эштә лә, өйөндә лә өлгөрә. Тормош иптәше Вилгә наҙлы ҡатын, улдары Йәркәй менән Ислам өсөн йән атып торған әсәй ул.

Ҡасандыр ҡатын-ҡыҙҙар йорт хужабикәһе булып, бала тәрбиәләү менән шөғөлләнһә, бөгөн иһә ҡыйыу рәүештә донъя мәшәҡәттәрен иңенә алып, ҙур эштәргә тотоноуҙан да ҡурҡмай. Гөлгөнә ханымдың да әле яу­лай­һы үрҙәре алда әле, нәҡ ошон­дай уңған гүзәл затта­ры­быҙ ҡатын-ҡыҙҙың ни тиклем көслө заттан булыуын сағыл­дыра.

Мең тапҡыр ишеткәнсе, бер тапҡыр күр, тигәндәй, һеҙгә уны тәмләп ҡарарға тәҡдим итәбеҙ. Предприятие менән хеҙмәт­тәш­лек итергә һәм тәҡдимдәр инде­рер­гә теләһәгеҙ, 8-906-103-96-47, 8-965-655-68-68 телефондарына шыл­ты­ратығыҙ, badalova-pel@yandex.ru электрон почта­һына яҙығыҙ.

Белорет районы.