Хозур тәбиғәтле Нөгөш йылғаһы буйындағы Андреевка утарында эшҡыуар Эдуард Ниғмәтуллин, тиҫтә йыл элек кәзә фермаһын асып, үҙ эшен башлай. Элегерәк ауылдарҙа был малды тотмаған ғаиләләр бик һирәк ине. Ваҡыт үтә, бөгөн ауылдарҙа кәзә аҫраған кешеләр бармаҡ менән генә һанарлыҡ. Шуға ла нәҡ ошо малдан килем алған Мәләүез фермеры менән аралашыу теләге уянды.
– Кәзә мал түгел, күршең менән дошманлашҡың килһә, кәзә аҫра, тиҙәр халыҡта. Ә һеҙ, нәҡ уны үрсетеп, килем алыу кәсебенә тотонғанһығыҙ, Эдуард Маркс улы.
– Башта ғаилә ағзаларының һаулығы өсөн генә тота башланыҡ. Тыумышым менән Федоровка районының Үрге Яуыш ауылынан мин. Ауыл тормошоноң уртаһында ҡайнап йәшәнем. Атайым Маркс Имам улы – селекционер, әсәйем Рима Һаҙый ҡыҙы зоотехник булып эшләне, үҙем ветеринар һөнәренә уҡыным. Олатайым Һаҙый Нәжметдин улы колхоз рәйесе вазифаһын башҡарған. Әйткәндәй, зат-ырыуыбыҙ уҡымышлы, шәжәрә осо алтын етештергән Закир Рәмиевтәргә барып тоташа.
Кәләшем Лиана Ришат ҡыҙы менән үләндәрҙең төрлөлөгө һаҡланған утарға күсеп, 33 гектарҙай ерҙе ҡуртымға алдыҡ та ҡымыҙ, сыр етештерә башланыҡ. Һуңғы йылдарҙа дауалау сараһы булараҡ та кәзә һөтөнөң абруйы арта. Халыҡ әкренләп был малҡайҙың файҙалы икәненә инана.
– Баштан тоҡомло мал аҫранығыҙмы?
– Беҙҙең өсөн һөтлө булыуы ҡиммәт. “Альп”, аҙаҡ аҡ төҫлөһө лә, “Заанен” тоҡомлоһо ла булды, уларын тараттыҡ та яңы тоҡомдо үрсетәбеҙ.
– Сыр етештерәбеҙ, тигәйнегеҙ...
– Тәүҙә Франциянан килгән ҡатын оҫталыҡ дәресе күрһәтте. “Һеҙҙә үләндең төрлөлөгө Альп тауҙарындағынан да байыраҡ, шуға күрә бер ниндәй тәмләткес тә ҡушырға кәрәкмәй”, – тине ул. Европала сыр етештереү буйынса конкурстарҙа алтын миҙалдар яулаған Олеся Шевчук исемле белгестә түләүле курста уҡып ҡайттым. Канадала йәшәгән Дэвид Эшерҙың китабынан да өйрәндем.
– Хәҙер ауылдың йөҙө үҙгәрә, ул шәхси хужалыҡтарҙа һыйыр һаны кәмеүендә лә күренә. Улар ауыл урамдарын тултырып көтөүгә сыҡмай. Иртәнге тынлыҡты яңғыратып, сыбыртҡы шартлауы, һуңға ҡалмаһын, тип ҡысҡыра-ҡысҡыра малын көтөүгә ҡыуалаусыларҙың тауышы ла ишетелмәй тиерлек. Ә һеҙҙең утар урамдарында, болондарҙа иркенләп йөрөгән кәзәләр күп кенә.
– Беҙҙең һауым малы – 56 баш, бәрәстәре 20-нән артығыраҡ. Башта ҡул менән һауҙыҡ, торараҡ һауын аппараты алдыҡ, кеше ялланыҡ. Төп эште үҙебеҙ башҡарабыҙ, ә улар һарай таҙартыу, йыуыу кеүек йөкләмәләрҙе үтәй. Һауын аппараты алһаҡ та, 40 процентын ҡул менән һауабыҙ, сөнки еленен тотоп ҡына малҡайҙың ауырыуын белеп була.
– “Кәзә – ярлының һыйыры” тигән боронғолар. Һеҙҙең уларға мөнәсәбәтегеҙҙе белдек инде.
– Былай ҙа сит сценарий буйынса йәшәйбеҙ. Кеше теләгән шөғөлө менән булышырға тейеш. Матди байлыҡ артынан ҡыуып, йән, рух тураһында онотоп китәбеҙ. Ғүмер – ҡыҫҡа ваҡыт, әҙәм балаһына ла самаһыҙ энергия бирелмәй. Кеше бәхетле булыр өсөн тыуа. Бөгөнгө заманда иһә уның шөғөлө күп, бәхетле булыр өсөн ваҡыты ҡалмай. Ә бында, тәбиғәт ҡосағында, тыныс, һалмаҡ тормош, ваҡыт та башҡаса уҙа кеүек. “Ни өсөн минең шылтыратыуға яуап бирмәйһең?” – тип үпкәләгән кешеләр ҙә бар. Гаджеттар ҙа ялҡыта. Биш, ете йәшлек Таһир, Камил улыбыҙ үҫә, уларҙың аңын артыҡ мәғлүмәт менән томаламаҫ өсөн телефонды самаһыҙ рөхсәт итмәйбеҙ. Уларҙың белемле булып үҫеүен теләйбеҙ. Гел ҡолағына наушник кейеп, сит ил музыкаһын тыңлап йөрөгән кеше кәрәкле ҡарар ҡабул итә алмай, тип иҫәпләйем мин.
Заманында 10 йыл тирәһе Шри-Ланкала йәшәнек, халыҡ-ара туризм менән шөғөлләндек. Сенегал телендә аралашам, инглизсә бер аҙ һупалайым. Татарса, башҡортса һөйләшкәндә лә урыҫ теленән ингән һүҙҙәрҙе ҡушырға тура килә.
– 56 кәзәбеҙ бар, тинегеҙ. Бер ҡараһаң, күп тә түгел.
– 200 башҡа еткән мәлдәр ҙә булды. Ул саҡта аҙыҡтың сифатын контролдә тотоу ҡыйынлашты. Беҙ үҙебеҙ етештергән продукция менән туҡланабыҙ, шуға ла ризыҡ һаулыҡ өсөн дарыу булырға тейеш, тип иҫәпләйбеҙ. Әлхәмдүлилләһи, сәләмәтлегем дә яҡшырҙы хәҙер. Ошонда күсеп килгәнгә 15 йыл. Биш тапҡыр намаҙҙан ҡалған юҡ. Яһаған сырға консерванттар ҡушмайбыҙ, ул 72 сәғәттә саҡ өлгөрә. Сауҙа селтәрҙәре менән хеҙмәттәшлек итмәйбеҙ, етештергән продукцияны ошонда уҡ алып бөтәләр.
Сәләмәтлек өсөн кешегә саф һауа, яҡшы ризыҡ, тыныс йоҡо кәрәк. Мин һәр кемдең кәзә һөтөн, ҡымыҙын эсеп, сәләмәт йәшәүен теләйем.
- Әҡлимә ИМАМОВА.
Мәләүез районы.