Аҡъярҙағы “Икмәкле ихата” икмәкханаһында бешкән әпәкәйҙәрҙе халыҡ эҙләп ала, тиһәм, һис яңылыш булмаҫ, сөнки ҡомалаҡ әсеткеһе менән бешерелгән икмәккә ихтыяж ҙур. Бында ҡамырҙан 10-дан ашыу төр ризыҡ етештерелә. Төрлө бәлеш, ҡалас, пицца, бөйөрөк – барыһы ла телеңде йоторлоҡ һәм бик тәмле!
Эшҡыуар Гүзәл Аллағолова әйтеүенсә, улар икмәк бешереү менән үткән йылдан алып шөғөлләнә. “Стартап” программаһы нигеҙендә район хакимиәтенән 300 мең һум дәүләт ярҙамы алыуға өлгәшәләр. Был аҡсаға икмәк бешереү өсөн мейестәр, кәрәкле ҡорамалдар һатып алына. Ярай әле бинаны ҡайныһы бүләк итә, уны тиҙ арала ремонтлап, икмәкхана итеп йыһазландырып та ҡуялар. Яҡын арала уның бер яҡ өлөшөн магазин итеп асырға йыйыналар. Көнөнә 200 дана икмәк бешерелә, артабан был һанды икеләтә арттырырға иҫәптәре, сөнки тәмле икмәк тиҙ һатылып бөтә, етмәй ҡала. Өс кешегә эш урыны булдырылған.
– “Шатлыҡ” исемле аҙыҡ-түлек магазиныбыҙ бар. Икмәк бешереүгә тотоноуыбыҙ ҙа юҡтан ғына түгел. Күп осраҡта магазинға икмәк алып килмәйҙәр йә етмәй ҡала, ә һораусылар күп. Уйланыҡ та, үҙебеҙ тәүәккәлләргә булдыҡ. Хәҙер сауҙа кәштәләренә йылы, йомшаҡ күмәстәр ҡуйыла. Шулай уҡ заказ буйынса бәлеш, бөйөрөк, пицца бешерәбеҙ. Урман янғындары булған осорҙа янғын һүндереүселәргә үҙебеҙ бешергән икмәкте даими рәүештә алып барҙыҡ, шулай уҡ аҙыҡ-түлек менән дә ярҙам иттек, – ти Гүзәл Вәкил ҡыҙы.
Ҡомалаҡты Юлбарыҫ ауылынан бер инәйҙән һатып алалар, ондо күрше Ырымбур өлкәһенән күмәртәләп килтерәләр. Йәш эшҡыуарҙың эше тулыһынса яйға һалынһын, икмәк бешереү күләме икеләтә артһын өсөн, бинаға һыу үткәрелмәүе бер аҙ ауырлыҡтар тыуҙыра. “Һыу мәсьәләһе лә хәл ителһә, эштәребеҙ алға китер әле”, – тип йылмайып оҙатып ҡалды беҙҙе Гүзәл Аллағолова.
Кәримә УСМАНОВА