Бөтә яңылыҡтар
Эшҡыуар
28 Июнь 2022, 14:41

Сифат менән алдыра

Ике йыллыҡ запас хәстәрләп ҡуйғандар.

Автор фотолары.
Фото:Автор фотолары.

Йәрмәкәй тарафтарына юл тотҡанда ошо төбәктә йәшәгән замандаштарыбыҙҙың тормош-көнкүреше менән танышып ҡайттыҡ. Тырышып мал-тыуар аҫрап, баҡса үҫтереп донъя көткән ғаиләләрҙе лә, йәштән тыуған ерендә төпләнеп уңышлы эшләгән эшҡыуарҙарын да, ҡул эше оҫталарын да, сәнғәт һөйөүселәрен дә күрҙек.

Тыуған ере өсөн янып-көйгән ир-уҙамандарҙың береһе – Азат Хә­кимов. Ул, районда икмәк бешереү эшен ойоштороп, яҡташтарын эшле лә, ашлы ла иткән.

“Йәрмәкәй икмәк комбинаты”н Салауат исемендәге ауыл хужа­лығы предприятиеһы эргәһендә бынан өс йыл элек асып ебәрә ул. Бина һатып алып, арыу ғына сығым һалып, тәүҙә ремонт үткәрә. Бер мил­лиондан ашыу һумлыҡ кәрәкле ҡорамалдарҙы ла һатып алырға тура килә. Тырышһаң, эш ҡарыш­май, тиҙәр бит. Сифат менән алды­ра эшҡыуар. Әсеткене лә улар бары тәбиғи ҡомалаҡтан эшләй. Бының өсөн ике йыллыҡ запас хәстәрләп ҡуйғандар.

– Бөгөнгө көндә районыбыҙҙың барлыҡ ауылдарын, мәктәп һәм ба­ла­лар баҡсаларын икмәк менән тәь­мин итәбеҙ. Бәләбәй районында ла беҙҙең икмәк биш сауҙа нөктә­һенә оҙатыла, – ти Азат Фәтҡелбаян улы.

Икмәк ташыуҙы бөтәһе дүрт машина башҡара. Күп­тән түгел генә бер миллиондан ашыу һумға яңы икмәк ташыу машинаһы алғандар.

Пекарня уңғандары менән дә таны­шып сыҡтыҡ. Унда көнөнә 860 да­на икмәк бешерелә, төрлө бәлеш­тәр әҙерләү ҙә яйға һалынған. Бар­лы­ғы 17 төр ҡамыр ризығы әҙер­ләнә.

Әйткәндәй, икмәк бешереү – ауыл хужалығы пред­прия­тиеһының бер йүнәлеше генә. Бынан тыш, ма­л­сы­лыҡ, үҫемлекселек менән дә шөғөлләнергә өлгөрә Йәр­мәкәй йүнселе.

Тыумышы менән ошо райондың Һыуыҡҡул ауылынан Азат Хәкимов. Армияла ғына ике йыл ситтә йөрөп ҡайта, ҡалған ғүмерен тыуған еренә арнай.

– Ситкә китергә теләк тә булманы. Йәрмәкәй халҡы һәйбәт, район етәкселеге лә ярҙам итеп тора. Шулай булғас, ҡырҙа эшләү уйы булманы. Тыуған ереңдә файҙалы булыу – үҙе ҙур бәхет, – ти әңгәмәсем.

Төплө эшҡыуар, үҙ еренең патриоты ғына түгел, ва­ҡытлы матбуғат баҫмаларына ла битараф булмаған ал­дынғы ҡарашлы замандашыбыҙ булып сыҡты Азат Фәтҡелбаян улы. Ул үҙенең хеҙмәткәрҙәренә ете дана “Башҡортостан – Йома” гәзитенә яҙҙыртырға вәғәҙәләп ҡалды.

Йәрмәкәй эшҡыуарының барлыҡ башланғыстарының да уң булыуын теләйбеҙ. Эшкә егәрлелеге менән уңышҡа өлгәшеүе – тормошта һыналған алым.


Р. ӘхмәтГӘРӘЕВА

Йәрмәкәй районы.

Читайте нас: