Халҡыбыҙҙың төп брендтарын тәшкил иткән башҡорт аты, башҡорт ҡымыҙы, башҡорт ҡурайы кеүек, башҡорт балы ла тотош донъяла киң танылыу таба бара. Халҡыбыҙҙың боронғо кәсептәренең береһе умартасылыҡ менән шөғөлләнеүселәрҙе бөгөн һәр ауылда тиерлек осратырға мөмкин. Күптәр был эшкә табышлы шөғөл кеүек ҡараһа, икенселәр унан башҡа йәшәй алмай, үҙҙәре лә бал ҡорттары кеүек умартасылыҡ серҙәрен өйрәнеүҙән туҡтамай.
Әбйәлил районында умартасылыҡҡа иғтибар йылдан-йыл көсәйә. Үҙҙәренең төп эшенән тыш, күңел ҡушыуы буйынса мәшғүлдәрҙең артыуы районда ҡортсолоҡто үҫтереүгә тос өлөш индерә. Шундай уңғандарҙың береһе Ринат Минһажев Салауат ауылында йәшәй. Бөгөн уның 20-нән ашыу умартаһы бар.
- Быйыл бал мул буласаҡ, бик матур итеп тәүге балды һығып та алдыҡ. Тәүҙә умарталарым йорт янында ултырҙы, әле йүкә урманына алып барҙыҡ, аҙаҡ кире ҡарабойҙай баҫыуы янына алып киләсәкбеҙ. Бер йылда өс төрлө бал алыу мөмкинлеге бар, - ти тәжрибәле ҡортсо.
Әбйәлил районының уңған умартасыһы хаҡында гәзитебеҙҙе алдағы һандарында таныштырырбыҙ.
Автор фотоһы.