Балыҡсы ҡайҙа ғына булмай ҙа ниндәй генә хәлдәргә тарымай! Һәр ваҡыт таныш булмаған урындарҙа булғы, яңы таныштар менән осрашҡы килә. Ошо маҡсаттан сығып, Дәүләкән яҡтарына юл тоттом. Ҡаранбаш быуаһына иртәнге 6-ла килеп еттем. Эй, һыу буйының матурлығы! Бер ерҙә сүп-сар күрмәҫһең. Балыҡ ҡармаҡлаусылар ҙа күренә. Күп тә үтмәй, быуаның хужаһы Андрей Владимирович Гончаренко килеп туҡтаны. Хәлдәрҙе һорашҡас, үҙемде ҡыҙыҡһындырған бер нисә һорауымды бирҙем.
– Андрей Владимирович, ишетеүемсә, был быуаны ҡуртымға алғанһығыҙ. Ни өсөн тап ошо быуа һеҙҙе ҡыҙыҡһындырҙы?
– Ғаиләбеҙ менән тәбиғәт ҡосағында ял итергә яратабыҙ. Икенсенән, Ҡаранбаш ауылы – тыуып үҫкән төйәгем. Минең уйымса, һәр шәхес тыуған ерен, ауылын матурлауға, үҫтереүгә үҙ өлөшөн индерергә тейеш. Өсөнсөнән, балаларым тәбиғәттең ҡабатланмаҫ матурлығын күреп үҫһен, тим.
– Белеүемсә, һеҙҙә балыҡ тотоу түләүле. Сер булмаһа, балыҡсы күпме түләргә тейеш? Быуала ниндәй балыҡтар бар?
– Беҙҙә балыҡ ҡармаҡлау ҡиммәт түгел, бер ҡармаҡҡа 100 һум күләмендә билдәләнгән. Унан тыш, ял итеү, йоҡлау өсөн өй төҙөгәнбеҙ, мунса эшләй, яр буйҙарына ағастар ултыртабыҙ. Шуныһы күңелде ҡыра: ҡайһы берәүҙәр көс етмәҫлек сумкалар менән тейәнеп килеп төшәләр ҙә ҡайтҡанда арттарынан сүп-сарҙы йыйыштырырға оноталар. Ярай әле, күлдең уңған хеҙмәткәрҙәре бар, быуа эргәләрен таҙа тоторға тырышалар. Киләсәктә балыҡсылар өсөн кәрәк-яраҡ магазины асырға уйлайым. Ә балыҡтарға килгәндә, һаҙан, аҡ амур, табан, суртан, алабуға үрсетелә. Беҙ табыш артынан ҡыумайбыҙ, балыҡсыларға, ял итеүселәргә уңайлы шарттар булдырырға тырышабыҙ.
– Киләсәккә пландарығыҙ нисек?
– 300-400 мең һумлыҡ селбәрә алып, быуаға ебәрергә уйлайым. Яр буйҙарын нығытырға кәрәк. Балыҡ ҡармаҡлау буйынса спорт ярыштары ойоштороу уйы ла бар.
– Бындай ҙур эштә терәк булырҙай ярҙамсыларығыҙ ҙа бармы?
– Эйе, иҫәп-хисап эшен ҡатыным Наташа башҡара. Улым Александр ҙа буш ваҡытында ярҙам итә, ҡыҙым Ирина әле Башҡорт дәүләт университетында уҡый. Бергәләп кәңәшләшеп эшләйбеҙ. Ҡаранбашҡа рәхим итегеҙ, үкенмәҫһегеҙ!