Һыу – йәшәү сығанағыбыҙ. Унһыҙ бер көн дә йәшәп булмаясағын һәр кем белә.
Быйыл Өфөлә Волга буйы федераль округындағы йылға-күлдәрҙең таҙалығын һаҡлау тураһында форум үтте. Унда республикабыҙҙың һыу сығанаҡтары тураһында ла һүҙ булды. Башҡортостан, Татарстан, Түбәнге Новгород йылғалары иң бысрағы тип әйтелде. Волганың әлеге хәлендә беҙҙең республиканың да өлөшө бар, сөнки, билдәле булыуынса, заводтарҙан химик матдәләр уға ҡойған Ағиҙелгә, Ҡариҙелгә ағып төшә.
Республикалағы ҙур йылғаларҙың – Ағиҙел, Ҡариҙел һәм Димдең бысраҡлығы 4 “А” категорияһы менән билдәләнә. Был күрһәткес буйынса иң юғарыһы – 5 “А”. Тимәк, беҙҙәге һыу сығанаҡтарының бысраҡлығы һуңғы нөктәгә етеп килә.
3 “А”категорияһын Ыҡ, Һаҡмар, Оло Ҡыҙыл һәм Йылайыр йылғалары “яуланы”. Баймаҡ районындағы Таналыҡ саҡ ҡына таҙараҡ – 3 “Б”.
“Беҙҙең йылғаларҙың һыуын эсергә ярамай, ул фильтр аша үтергә тейеш”, – тип белдерҙеләр Башгидрометүҙәктән. Ҡыҙғанысҡа ҡаршы, республикалағы заводтар йылғаларҙың ҡырҡ процентын ағыулай: фенол, нефть ҡалдыҡтары, тимерҙең төрлө ҡатнашмалары... Күрше төбәктә лә шул уҡ хәл.
Йылғаларҙы тәртипкә килтереү буйынса федераль проект ҡабул ителде. Ул Волганы тергеҙеү, һауыҡтырыу маҡсатын күҙ уңында тота. Ҡаҙнанан 227 миллиард һум талап ителәсәк, шуның 38,6 миллиардын төбәктәр индерергә тейеш, шул иҫәптән Башҡортостан да. Беҙҙә һыуҙың дүрт проценты ғына таҙартыла, хатта ямғырҙан йыйылғандары ла торбалар буйлап туп-тура йылғаларға ағып төшә.
Һыу инеү урындары тураһында айырым әйтергә кәрәк. Яҙ барыһы ла тикшерелә, лицензия бирелә, әммә беҙҙең халыҡ уға иғтибар итмәй, ҡырағай урындарҙа ял итеүсән, шул сәбәпле тире ауырыуҙарын йоҡторалар ҙа инде. Был мәсьәләне яйға һалыу йәһәтенән Тәбиғәттән файҙаланыу һәм экология министрлығы һөҙөмтәле эш алып бара башланы.
- Әсләм КАМАЛОВ