Быйыл Башҡортостанда Бөтә донъя фольклориадаһы үтеүе тураһында гәзит уҡыусыларыбыҙ хәбәрҙар. Ошо уңайҙан фольклорсылар менән әңгәмәләр ойошторабыҙ. Тәүге ҡунаҡтарыбыҙ – филология фәндәре докторы Нәркәс Хөбөтдинова менән филология фәндәре кандидаты Гөлнар Юлдыбаева. Улар ойошторған фольклор экспедицияларының һөҙөмтәләре халҡыбыҙҙың төпкөлдәрҙә рухи байлыҡтары һаҡланыуы хаҡында һөйләй. Әйткәндәй, Тарих, тел һәм әҙәбиәт институты тарафынан һуңғы йылдарҙа уҙғарылған ошо экспедициялар нигеҙендә китаптар нәшер ителде.
– Һуңғы арала фольклорсылар нимә менән шөғөлләнә?
– Хәҙерге заманда гранттар системаһы эшләй. Ошо уңайҙан беҙ ҙә бүтән өлкәлә йәшәгән милләттәштәребеҙ менән араларҙы нығытыу маҡсатында эш башланыҡ һәм Рәсәй Фундаменталь фәндәр тикшеренеүҙәр фонды грантын отоуға өлгәштек. Был эште Ҡазандағы коллегабыҙ Лилиә Мөхәмәтйәнова менән бергәләп атҡарҙыҡ, сөнки гранттың маҡсаты милләттәр, мәҙәниәттәр бәйләнештәрен өйрәнеү булды. Ул үҙенең экспедиция мәғлүмәттәре, Ҡазан архивтарында һаҡланған дөйөм мираҫыбыҙҙың өлгөләре менән уртаҡлашты. Беҙ, Рәсәй Фәндәр академияһы Өфө федераль тикшеренеүҙәр үҙәге “Почет Билдәһе” орденлы Тарих, тел һәм әҙәбиәт институты ғалимдары Әхәт Сәлихов, Гөлнар Юлдыбаева һәм мин, комплекслы экспедицияға сыҡтыҡ. Йәғни мин – боронғо әҙәбиәт (хикәйәттәр, хәтирәләр), Гөлнар Вилдан ҡыҙы – фольклор, Әхәт Ғөбәй улы археография – боронғо яҙма китаптар һәм ҡулъяҙмалар буйынса мәғлүмәт тупланыҡ. 2018 йылда Ҡурған өлкәһендә булдыҡ, былтыр Пермь тарафтарына юлландыҡ. Ялан-ҡатай башҡорттары йәшәй бит инде Ҡурған яғында.
Әлбиттә, уларҙың теле, һаҡланған мираҫы Башҡортостан башҡорттарына яҡын, унда заманында башҡорт телен дә уҡытҡандар.
Шуныһы ҡыуандырҙы һәм ҡыҙыҡһындырҙы: ҡәрҙәштәребеҙ күп кенә үҙенсәлекле рухи мираҫ өлгөләрен һаҡлай, тирә-яҡ тәбиғәтте образлы, фольклорса фекерләп, күҙәтеүен дауам итә. Мәҫәлән, Сафакүл районының Абултай ауылында информанттан халҡыбыҙҙа билдәле легенда һаналған Айҙағы Зөһрә ҡыҙ тураһында һорашҡайныҡ, ул ҡыҙыҡлы мәғлүмәт әйтеп һалды. Легенданың йөкмәткеһен бәйән итеп, ахырын былай һөйләп бирҙе: “Ә һеҙ беләһегеҙме, Айҙағы Зөһрәнең һүрәте үҙгәргән бит!” Беҙ аптырап ҡалдыҡ. Нисек инде үҙгәргән? “Бына иғтибар менән ҡарағыҙ әле тулған айға, унда хәҙер биҙрәләр юҡ”, – ти. Халыҡта элеккесә мифик фекерләү һаҡланған, ул ҡарашын күктән алмай. Бәлки, ысынлап та, күк йөҙөндә, Айҙа ниндәйҙер атмосфера үҙгәрештәре баралыр, ундағы таптар юғалып йәки күренмәй торалыр. Тимәк, халыҡ тирә-яғын, донъяһын күҙәтә, үҙенең әлеге тормошон шул мифик тарихтың дауамы тип иҫәпләй. Киләсәктә ошондай мәғлүмәт һаҡлаусыларҙың әйткәненә нығыраҡ иғтибар итергә кәрәк, тигән фекергә килдек. Халыҡта ошондай мифик фекерләү һаҡлана икән, донъяны боронғоса ҡабул итеү ҙә бар, йоласылыҡ дауам итә.
– Нәркәс Әхмәт ҡыҙы әйтеп үтеүенсә, былтыр беҙ Пермь крайының Барҙа, Уй райондарына комплекслы экспедиция ойошторҙоҡ. Тәүге көндән башлап Барҙа тыуған яҡты өйрәнеү музейы директоры Альберт Рәфил улы Мәхмүдов ҙур ярҙам күрһәтте. Иҫ китмәле бай күңелле, Башҡортостан тарафынан үҙенә яҡты мөнәсәбәт көткән халыҡ йәшәй был төбәктә.
– Нисек йәшәй һуң ундағы башҡорттарыбыҙ?
– Әлбиттә, барыһы ла ал да гөл түгел. Туған телде, рухи ҡиммәттәрҙе, башҡортлоҡто һаҡлау яғынан беҙгә унда күп эшләйһе бар. Халыҡ менән бит ай һайын, көн һайын тиерлек аралашып торорға кәрәк. Пермь крайы яҡын ғына торһа ла, мәҫәлән, Хәйбуллаға ҡарағанда яҡыныраҡ, Башҡортостан тарафынан иркәләнгән төбәк булманы. Бына һуңғы йылдарҙа милләттәштәребеҙҙең юлы төшә башлауы бик ҡыуандыра. Дәүләт кимәлендә ойошторолған ҙур сара – Башҡортостан Мәғарифы һәм мәҙәниәте көндәре лә үтте бит инде.
– Тел йәһәтенән нимә тиҙәр?
– 1924, 1925 йылғы инәйҙәр менән аралашыу бәхете тейҙе. Улар беҙгә: “Телебеҙ боҙолған инде ул, әммә беҙ башҡорт”, – ти.
– Һуң телдәре боҙолмаған бит, ә бары тик башҡорт теленең төньяҡ-көнбайыш диалекты һөйләше!
– Улар үҙҙәренең башҡортлоғон таный – шуныһы мөһим. Уҙған быуатта ла Пермь крайында ғилми экспедициялар эшләгән, беҙҙең институт фольклорсылары, телселәре, этнографтары әүҙем өйрәнгән, бик күп мәғлүмәт туплаған был яҡтарҙа. Төбәк халҡы асыҡтан-асыҡ: “Беҙ – Ғәйнә башҡорттары, борондан бында йәшәйбеҙ!” – ти. Әммә ана шул тел үҙенсәлеге уларҙы ситләткән. Бөгөн диалекттар темаһы ыңғай яҡҡа үҙгәрә, халыҡ фекерен үҙ телендә, ата-бабалары аралашҡан һөйләштә еткерергә тейеш, шуға күрә уларға иғтибарыбыҙ тағы ла нығыраҡ артырға тейеш.
– Аңлылары, тарихты белгәндәре башҡортлоғон раҫлап, үҙ милләте булып теркәлә. Алда Бөтә Рәсәй халыҡ иҫәбен алыу эше тора, шуға күрә был мәсьәләгә күҙ йомоп ҡарамаһаҡ ине. Уларҙың бөгөнгөһөн түгел, ата-бабаһының кем булыуын белеү, асыҡлау зарур. Былтыр ноябрь айында уларҙа Ғәйнә башҡорттарының билдәле тарихи шәхестәренә, ғөмүмән, халыҡҡа арналған конференция ла булып үтте.
– Экспедицияларҙа тағы ла нимә күҙгә ташлана?
– Әлеге көндә халыҡ ижады дин менән үрелеп килә. Күп осраҡта оло быуын беҙҙең һорауҙарға яуап итеп аят, доға уҡый башлай. Был, бер яҡтан, әлбиттә, һәйбәт күренеш, әммә мифик фекерләү, шуға ярашлы һаҡланған боронғо ауыҙ-тел ижады ҡомартҡыларының юғалыуы ҡыҙғаныс. Ололар хәтерендә йолалар һаҡланған, әммә уны башҡарғанда ниндәй һамаҡтар барлығы онотолған, ни өсөн башҡарылған тигән һорауҙарға яуап, әбей-бабайҙар әйткәнсә, “Хоҙай ҡушҡан”ға ҡайтып ҡалған. Ҡурған өлкәһендә шундай ваҡиға булды: бер әбей беҙҙең ниндәй маҡсат менән йөрөгәнде белгәс, әйҙәгеҙ беҙгә, мин күп әкиәттәр беләм, тип алып инде, ләкин һөйләй башлайым тиһә, аят уҡып ала ла китә. Ул хатта үҙе лә аптырап китте. Шунан ул беҙгә: “Мин намаҙға баҫтым, балалар, зиһенемде, күрәһең, аят яулаған!” – тине.
Әлеге көндә күпселек осраҡта туй йолалары, ерләү ғөрөф-ғәҙәттәре, һынамыштар, тыйыуҙар, йырҙар, таҡмаҡтар яҙып алына. Пермь крайының төпкөл ауылдарында иһә башҡорт халыҡ йолалары тотороҡло һаҡланған. Беҙгә был төбәктә һабантуй алдынан үткәрелгән “Һөрән һуғыу” йолаһы күренешен күрергә насип булды. Халыҡ был йоланы ихлас башҡара. Ауыл буйлап һәр өйгә инеп, йыр, таҡмаҡ менән ҡолғаға әйбер йыялар, шунда уҡ теләктәр әйтәләр, ә балаларға кәнфит, тәмлекәстәр бирәләр. Һуңынан бүләктәрҙе һабантуй ярыштарында еңеүселәргә тараталар. Байрам барышында ҡатнашыусылар милли кейемдәрҙә йөрөй, был да – милли асыл сағылышы.
– Һуңғы йылдарҙа барған ҡулайлаштырыу һөҙөмтәһе булараҡ, бөгөн ауыл клубтары менән китапханаларҙы берләштереп бөттөләр бит инде.
– Барҙала ла шул күренеш: клуб китапхана ла, мәҙәни үҙәк тә тиергә була. Альберт Рәфил улы, алдан хәстәрлек күреп, шунда фольклор, йәғни халыҡ ижады музыкаль-ижади төркөмгә йөрөгән инәйҙәрҙе саҡырғайны. Тәүҙә улар беҙгә ситләшеп ҡараны, сөнки тел үҙенсәлеге лә кәртә булып тора. Халыҡҡа үҙ булыр өсөн уларҙың һөйләшен дә ҡулланырға кәрәк, шуға Альберт Рәфил улы башлап һөйләп ебәрә, аҙаҡ беҙ ҡушылабыҙ, шул рәүешле уртаҡ тел табып алдыҡ. Уларҙан сәхнәлә нимә күрһәтеүен һорашабыҙ, сөнки фольклорға йөрөгәс (инәйҙәр үҙҙәре был шөғөлдәрен “фольклорға йөрөү” тип атай), улар халыҡ ижадын сағылдырырға тейеш булып сыға бит. “Бәләкәй саҡта ниндәй уйындар уйнаныҡ, нимә йырланыҡ, әсәйҙәребеҙ нимә йырланы, шуны алып сығабыҙ инде сәхнәгә!” – тиҙәр. Беҙгә тап шул кәрәк бит инде!
– Был төбәктең бейеүҙәре лә бик үҙенсәлекле. Бейегәндә береһе лә бер-береһенең хәрәкәттәрен ҡабатламай. Мәҫәлән, бейей башлаған кеше тәү башта гармунсы ҡаршыһына барып баҫа, һуңынан түңәрәк уртаһында бейей, артабан инде икенсе кешегә барып баҫып, тыпырҙап уны бейеүгә саҡыра. Икенсеһе төшөп китә, тик ул бөтөнләй икенсе хәрәкәттәр менән бейей. Өсөнсөһө инде – йәнә башҡаса.
– Эш мәлендә туй йолалары тураһында әңгәмә – үҙе бер ҡыҙыҡлы күренеш. Был яҡтарҙа ла борон ҡыҙҙарҙы урлап алып ҡайтыу киң таралған булған икән. Ҡыҙҙы урлап алып ҡайтҡас, улар башта муллаға бара. Мулла ҡыҙҙан “Риза булып бараһыңмы?” тип һорай. Мулла йәштәрҙең рөхсәтен алғас, бата уҡый, йәғни ризалыҡ бирә. Был – никах түгел, ә бергә йәшәүгә рөхсәт. Бында йәштәр икеһе генә була. Шунан һуң ғына никахҡа керәләр, аҙаҡ – туй. Уныһы күпкә һуңғараҡ булыуы ла ихтимал.
– Пермь крайында һирәк осрай торған халыҡ ижады өлгөләре лә һаҡланған. Мәҫәлән, 6 апрель көнөн улар “Тын тыңлау көнө” тип атай икән. Элек бит кәртә-ҡура булмаған, йәштәр ҡараңғы төшкәс, кеше өйөнә бара ла тын тыңлай, йәғни эстә һөйләшкәнде тыңлай. Нимә ишетәләр, шуны киләсәккә юрайҙар. Быны күберәк һуғыш ваҡытында эшләгәндәр. Тылдағы ҡатын-ҡыҙҙар ошо рәүешле ире ҡайтамы-юҡмы, хәле нисек һәм башҡа һорауҙарына яуап эҙләгән. Ә эстәге кеше әгәр тын тыңлағанды белеп ҡалһа, ҡайһы бер осраҡта махсус рәүештә нимәнелер ныҡ итеп һуғып, ҡаты тауыш сығарған, тыңлап торған кешенең ҡолағы һаңғырау (ҡолаҡай булыу тиҙәр) булып ҡала яҙған хәлдәр ҙә булған. Шулай уҡ, кис еткәс, ҡыҙҙар утынлыҡҡа сығып, ҡарамай-нитмәй, берәр утын алған. Әгәр утын ҡалын, ботаҡлы булһа, тимәк, ире оло, әгәр ҙә инде шыма, таҙа, еңел утын эләкһә, тимәк, хәләле йәш булыр, тип юрағандар. Йәнә лә мунсала ла һынамыш яһайҙар: төнлөктән (стена буйында булған бит инде әүәле) ҡулдарын сығаралар ҙа берәйһенең килеп тотҡанын көтөп торалар. Ҡулды тотҡан кешенең ҡулы ҡаты булһа – оло, йомшаҡ булһа, йәш кешегә кейәүгә сығасаҡтары тураһында һөйләй инде, йәнәһе.
– Ғәйнәләрҙең һөйләше үҙенсәлекле тип әйттек бит әле, бына шуның нигеҙендә һүҙлек тә төҙөп маташтыҡ. Мәҫәлән, улар “ҡолаҡай булып ҡалған” тип әйткәндә, кемдеңдер һаңғырау булып ҡалыуын аңлата. Ғөмүмән, был тарафҡа телселәр, диалектологтар экспедицияға барырға тейеш. Һәр фән белгесе, үҙенең тармағынан сығып, унда мәғлүмәт туплай ала.
– Ғөмүмән, экспедицияға барғанда, беҙ тәүҙә урындағы халыҡтың телен өйрәнәбеҙ. Тәүге көн тел үҙенсәлегенә төшөнөү менән үтә. Ҡурған өлкәһендә лә шулай булды, сөнки төбәктәрҙә башҡорт теленең боронғо һөйләштәре һаҡланған. Бер нисә көндән һуң инде уларҙың һөйләшендә аралаша башлайбыҙ. Был – үҙенә күрә фәнни сәфәрҙәге мәғлүмәт туплауҙың бер юлы. Мәҫәлән, Пермдә оло йәштәгеләрҙе аңлау күпкә еңелерәк булды, сөнки башҡорт теленең тарихи асылы һаҡланған, ә бына йәштәрҙең телен аңлауы ауырыраҡ. Ни өсөнмө? Сөнки һуңғылары татар телендә уҡыған һәм, хәҙерге көндә башҡорт һөйләше менән бергә ҡушылып, тел бөтөнләй аңлашылмаған форма алған.
– Быуат менән быуат фольклористикаһында айырма бармы?
– ХХ быуатта эшләгән фольклорсылар Кирәй Мәргән, Ниғмәт Шоңҡаров, Әхмәт Сөләймәнов, Фәнүзә Нәҙершина, Розалия Солтангәрәева, әлбиттә, оло быуындан күберәк, бай йөкмәткеле халыҡ ижады өлгөләре йыйған. Беҙҙең быуын фольклорсыларына меңәр юллыҡ эпик әҫәрҙәр, әллә нисәмә төндәр һөйләнелгән әкиәттәр, тарихи нигеҙле оҙон йырҙар килеп етмәне, ҡыҙғанысҡа ҡаршы. Әммә әлеге көндә лә ифрат ҡыҙыҡлы мәғлүмәттәр яҙып алырға була. Шуны ла әйтеп китәйем, Башҡортостан райондарында яҙып алынған халыҡ ижады өлгөләре менән күрше өлкәләрҙәге халыҡ ижадын сағыштырып өйрәнгәндә, фольклорҙың уларҙа тотороҡло һәм үҙгәрешһеҙ һаҡланыуы күҙәтелә.
– Ә беҙҙә заманға яраҡлашып үҙгәргәнме, әммә йолалар үҙгәреш кисергән. Нимә ишетергә теләһәң, шуны әйтәләр төҫлө. Йәнә лә хәҙер халыҡ ныҡ уҡымышлы, ҡулында – китап, шуға күрә баштағы, зиһендәге түгел, ә ҡайҙандыр уҡыған мәғлүмәтен еткерәләр.
– Йолаларҙа ниндәй айырмалар бар?
– Мәҫәлән, Ҡарға бутҡаһы менән Ямғыр теләүҙе Башҡортостандың күп райондарында бер үк йола итеп башҡаралар. Ә, нигеҙҙә, улар икеһе – ике күренеш. Күрше өлкәләрҙә был ике йола ла ныҡлы һаҡланған.
Пермь крайында ла, Ҡурған яҡтарында ла миңә халыҡ араһында киң таралыш алған “Саҡ менән Суҡ” бәйетенең тулы варианттарын яҙып алырға насип итте. Был бәйет менән ҡыҙыҡһыныуым күптән килә, Рәсәй Фундаменталь тикшеренеүҙәр фонды гранты сиктәрендә был бәйет буйынса проект та әҙерләнем. Беҙҙең фольклор бүлеге аспиранты Гөлназ Сәлимйән ҡыҙы Ханова менән 600-ҙән ашыу бәйет тексын тупланыҡ. Һәм 2018 йылда “Башҡорт халыҡ бәйете “Саҡ менән Суҡ” китабы донъя күрҙе. Был китапта бәйеттең үҙенсәлекле текстары урын алды. Әҫәр халыҡ телендә йәшәһә лә, бөгөнгә тиклем уға арналған фәнни эш юҡ ине.
– Беҙгә һәр бер бәйетте, варианттарын хатта китап итеп туплап нәшерләгәндә һис насар булмаҫ ине, сөнки улар барыһы ла башҡорт ерлегендә яралған.
– Экспедицияларҙа халыҡ менән осрашҡанда, эпостарҙы өйрәнгән белгес булараҡ, берәй генә эпик әҫәр, ҡобайыр, бәйет яҙып алып булмаҫмы тип һорашам. Әммә әлеге көндә тулы йөкмәткеле, мең юлдарға һуҙылған эпостар яҙып алыу бәхете теймәне. Эпик ҡобайырҙарҙың бары тик ҡайһы бер мотивтары, сюжеттары ғына һаҡланған. Ҡыҙғанысҡа ҡаршы, эпостар ғына түгел, әкиәттәр ҙә һирәк яҙып алына. Мәғлүмәттәрҙе лә бик оҙаҡ әңгәмәләшеп, тәрән төпкөлдән, зиһен түрҙәренән сығарып алабыҙ.
Стәрлебаш районында экспедицияла йөрөгәндә, бер апай “Урал батыр” әкиәтен һөйләне. Үҙенең милләтен татар тип таныштырһа ла, был апай әңгәмә барышында беҙгә башҡорт фольклорын бәйән итте. Мин унан мәғлүмәтте кемдән алыуы тураһында һораштым. Баҡтиһәң, уға олатаһы һөйләгән икән, ә ул башҡорт булып сыҡты. Экспедицияларҙа “Ҡуҙыйкүрпәс менән Маянһылыу”, “Заятүләк менән Һыуһылыу” кеүек эпик әҫәрҙәрҙе, бик тулы булмаһа ла, ишетергә тура килә. Был табылған мәғлүмәттәр ҙә – беҙҙең өсөн бай хазина.
Ғилми сәфәрҙә мөмкин тиклем төпкөл ауылдарға барып етергә тырышабыҙ, ана унда мәғлүмәт һаҡланған. Йәнә лә ул ауылдарҙа шуға иғтибар итәм: китапхана нисек эшләй, гәзит-журналдарҙы алдыралармы? Дөрөҫөн әйткәндә, башҡорт баҫмалары алыҫ ауылдарға барып етмәй. Китаптар менән дә шул уҡ хәл. Ҙур сараларға, ҙур ҡалаларға һәр башҡорттоң барып етә алмауы ла ихтимал, шуға күрә беҙҙең халыҡ йәшәгән һәр бәләкәй ауыл менән бәйләнеш булдырыу мөһим.
– Ысынлап та, беҙҙең фәнни китаптар, фольклор йыйынтыҡтары сит өлкәләргә барып етмәй. Ә ҡәрҙәш халыҡтарҙың китаптары тиҙ тарала. Ошо рәүешле уларҙың мәҙәни үҫеше күҙәтелә. Беҙ экспедицияларҙа, коллегам әйткәнсә, төпкөлдәргә барып етергә тырышабыҙ, йәнә лә халыҡты бер урынға йыйыуҙан бигерәк, уларҙың үҙҙәрендә, өйҙәрендә күрешәбеҙ. Беҙҙең халыҡ бик әҙәпле, оялсан, шуға күрә бай мәғлүмәтле әбей уңайһыҙланып йортонда ҡалыуы ла ихтимал. Ә үҙҙәренең мөхитендә улар асыла, һөйләшә, фекер алыша.
Һөйләштәренә ҡарап, тыңлап, беҙгә милләттәштәребеҙҙе тупларға кәрәк. Мәҫәлән, 1926 йылға тиклем Пермь өлкәһендә бөтә ауылдар ҙа тиерлек башҡорт булған. Әҙәби тел ҡабул ителгәс, шул уҡ халыҡ милләтен үҙгәрткән. Тарихи ысынбарлыҡ, дөрөҫлөк тураһында оноторға ярамай.
Был хаҡта оло быуын вәкилдәре бик яҡшы аңлай, сығышын, тарихын яҡшы белә, урта һәм йәш быуын ваҡыт шауҡымына бирелгәнлектән, уларға асылдарына ҡайтырға ярҙам итергә кәрәк.