“Әйләнә, орсоҡ әйләнә”

Унда күрше Баймаҡ районының Аҡморон һәм Сәйғәфәр ауылы ағинәйҙәре ҡатнашты. Был көндә, ысынлап та, һәр оҫтаның ҡулында орсоҡ әйләнде: йөн тетелде, сиратылды, иләнде. Һәр кем нимә бәйләүе хаҡында үҙ тәжрибәһе менән уртаҡлашты, халҡыбыҙҙың боронғо шөғөлө үҙенсәлектәрен күрһәтте. Сара матур йыр-моң, дәртле бейеүҙәр менән аралашып барҙы.

Конкурсты ойоштороусы Зилә Һаҡмарова белдереүенсә, бындай сараны былтыр ҙа уҙғарғандар. Унда Баймаҡ районынан Урғаҙа һәм Байыш ауылы оҫталары ҡатнашҡан. “Бындай сараларҙың төп маҡсаты - халҡыбыҙҙың элекке шөғөлдәрен тергеҙеү, йәш быуынға еткереү, район-ҡала бәйләнешен нығытыу, тәжрибә туплау, аралашыу. Был эште киләсәктә лә дауам итергә уйлайбыҙ”,- ти Зилә Сәлимйән ҡыҙы.

Командалар араһында үҙ-үҙе менән таныштырыу, йөн иләү, сиратыу, аяҡлау һәм йомғаҡлау ярыштары үтте. Баһалама ағзалары һәр оҫтаның эште күпме ваҡытта атҡарып сығыуына иғтибар итте, йомғаҡты нисек - ҡатымы, йомшаҡмы - йомарлауын тикшерҙе.

Беренсе урынды “Хазина” ансамбле (Сәйғәфәр ауылы) яулаһа, икенселә - “Алтын”дар, өсөнсөлә - Аҡморондан “Гөлнәзирә “ ансамбле.

Матур сараны тағы ла йәмләп, Насип Һаҡмаров гармунда өҙҙөрөп уйнаны, төрлө йырҙар башҡарҙы.

Фотолар "Тиҫтер" клубы сайтынан.