“Тылсымлы донъя был!”

Фольклориадаға ошо эҫе илдән килгән бейеү төркөмө ҡыҙҙары республикабыҙҙың баш ҡалаһынан, бөгөнгө сағыу тантананан сикһеҙ тәьҫораттар алып, фекерҙәрен әйтергә һүҙ ҙә таба алмай торҙо хатта.

– Тылсымлы донъя был! – тине улар, ҡулдарын йөрәк тәңгәленә ҡаушырып. – Ошондай ҙа сағыу, гүзәл тамашаны тәүгә күрҙек, хистәрҙе әйтеп бөтөргә һүҙҙәр етмәҫ, моғайын.

Өфөгә килгәндә, ҡала ла күңелдәрендә йылы тойғолар уятҡан.

– Салауат Юлаев майҙаны, башҡалары – һеҙҙә һәйкәлдәр ҙә, биналар ҙа шундай бейек, матур! – ти парагвайҙар. – Беҙҙә ундай ҙур статуялар булмағанға, айырыуса иҫебеҙ китте. Ҡала шундай таҙа, сәскәләргә күмелгән, халыҡ алсаҡ!

Хис-тойғоға бай ҡыҙҙар кемуҙарҙан баш ҡалабыҙға һоҡланыуын еткерә, ойоштороу кимәленең иҫ киткес юғары икәнен билдәләй.

– Рәхмәт йөҙөнән, һеҙгә тиҙерәк үҙ бейеүҙәребеҙҙе күрһәтке килә, – тиҙәр. – Ҡайтҡас, ҡунаҡсыл халҡығыҙ, матур, бай мәҙәниәтегеҙ тураһында иҫебеҙ китеп һөйләрбеҙ инде. Иң беренсе һүҙҙәребеҙ шул булыр: иҫ киткес кимәл, иҫ киткес мөхит, иҫ киткес йылы мөғәмәлә!

Автор фотолары.