“Мөһим сараға ярҙам итеүебеҙгә шатбыҙ”

– Тәүге тапҡыр үҙебеҙҙе был сифатта һынайбыҙ, – ти Зәлиә Алтынбаева, Бөрйән ҡыҙы. – Алдан әҙер­лек үттек. Төрлө урын­дарға бүленеп, ҡунаҡ­тарға ярҙам итәбеҙ. Фольклориада бөт­кәнсе ошо эште баш­ҡарасаҡбыҙ. Бындай мөһим, киң масштаблы сара эшмәкәрле­гендә яҡындан ҡатнашлыҡ күрһәтә алға­ныбыҙға бик ҡыуанабыҙ.

Буранбай Ҡолмөхәмәтов – Зәлиәнең курсташы. Ул да тәьҫораттары менән ихлас уртаҡлашты.

– Фольклориадала ҡатнашыу оҡшай. Әле беренсе көнө генә әле, сит ил ҡунаҡтары менән яҡынданыраҡ танышып та бөтөрбөҙ тип уйлайым. Халыҡ-ара фольклориаданың Башҡортостанда үтеүе республикабыҙ өсөн ҙур уңыш, уны донъяға танытыу, имиджын күтәреү өсөн ифрат мөһим сара, – тип иҫәпләй Буранбай. – Беҙҙең халҡыбыҙ ижады, тарихы ғәйәт бай, фестиваль ҡунаҡтары уның менән таныша, үҙҙәре өсөн беҙҙең милләтте аса аласаҡ. Бөтә донъя фольклориадаһы ошо яҡтан да баһалап бөткөһөҙ мәғәнәгә эйә.