“Тағы бер тапҡыр иркенләп килергә хыялланам”

Ул Пятигорск ҡала­һында инглиз һәм немец телдәренән тәржемәсе булып эшләй. Сығышы ме­нән Силәбе ҡалаһынан.

“Өфө Силәбегә әллә ни алыҫ булмаһа ла, бер тапҡыр ҙа килгәнем юҡ ине. Башҡортостанда донъя кимәлендәге ҙур сара – Фольклориада үтеүе тураһында ишеткәс, ирекмән булып барырға теләк белдерҙем. Әммә сара кисектерелде. Әлбиттә, был үҙгәрештәр тәү сиратта ҡатнашыусыларҙың һаулығын ҡайғыртып эшләнде. Быйыл да сара булмаҫ тип ҡурҡҡайным. Шулай ҙа ҡаршылыҡтар артта ҡалды. Беҙ бөгөн Өфөлә. Миңә иң оҡшағаны Ағиҙел буйлап теплоходта йөрөү булғандыр. Тағы бер тапҡыр иркенләп килергә хыялланам.

Ҡунаҡтарға килгәндә, барыһы ла ҡәнәғәт. Ҡатнашыусылар бар сараларҙа ла әүҙем ҡатнаша, ентекләп ҡарай, өйрәнә. Әлбиттә, һәр милләттең үҙ аш-һыуы була. Ниндәйҙер аҙыҡ-түлек ят булып күренеүе ихтимал. Мин оҙатып йөрөгән төркөмгә, мәҫәлән, ҡарабойҙай ашы ят булып тойолдо. Тәҡдим ителгән башҡа ризыҡҡа өҫтөнлөк бирҙеләр. Айырыуса милли аштар күңелдәренә хуш килде”, – тип тәьҫораттары менән уртаҡлашты ирекмән Ирина.