Ике бүләк – Ауырғазы районында

Башҡортостан юлдаш каналының “Сәләм” иртәнге шоуында матбуғат сараларына яҙылыусылар араһында бүләктәр уйнатылды. 2024 йылдың икенсе яртыһына гәзит-журналдарға яҙылыусылар араһында “Башҡортостан Республикаһы” нәшриәт йорто мотоблок, туңдырғыс, робот-саңһурҙырғыс, ноутбук, телевизор отторҙо. Ике бүләк Ауырғазы районында йәшәүселәргә эләкте. Төп приз – мотоблок – Талбазынан Валерий Алексевтың, туңдырғыс Мораҙым ауылынан Факил Дилмөхәмәтовтың өлөшөнә төшкән көмөш булды. 

Валерий Алексеев 40 йылдан ашыу “Аургазинский вестник” гәзите редакцияһында фотохәбәрсе булып эшләй. Әле ул – хаҡлы ялда. Ул ижади кеше булараҡ,  тыуған яғы, мөхәббәт, тәбиғәт тураһында шиғырҙар яҙа. Шиғырҙары сыуаш шағирҙары йыйынтығында донъя күргән. Валерий Евдокимович 2024 йылдың икенсе ярты йыллығына ике “Урал Сасси” милли баҫмаһына, “Аургазинский вестник” гәзитенә яҙылған. “Башҡортостан Республикаһы” нәшриәт йортоноң ҙур бүләге көтөлмәгән ҡыуанысҡа әүерелгән.

Факил Дилмөхәмәтов – ауыл хужалығы ветераны, оҙаҡ йылдар райондағы иң яҡшыларҙың береһе һаналған “Урал” ауыл хужалығы предприятиеһына етәкселек иткән. Хаҡлы ялға сыҡҡас, ижтимағи тормошта әүҙем ҡатнаша, тыуған яҡты өйрәнеү менән ҡыҙыҡһына, шәжәрә төҙөү менән шөғөлләнә. Ул “Аургазинский вестник”, “Йәшлек”, “Әс-сәләм” баҫмаларына яҙылған.

Үҙҙәренә бәхет йылмайғандарҙы бүләкләргә “Башҡортостан Республикаһы” нәшриәт йортоноң матбуғат баҫмаһын таратыу бүлеге етәксеһе Клара Әхиәрова килде.

Әйткәндәй, отош һәр ярты йыл һәм матбуғатҡа яҙылыу барышында ойошторола. Бының өсөн мотлаҡ “Башҡортостан Республикаһы” нәшриәт йортонда донъя күргән ике йәки күберәк баҫмаға (республика, ҡала йәки район) яҙылырға кәрәк.

Сығанаҡ, фотолар: aur-vesti.info