-9 °С
Болотло
Бөтә яңылыҡтар
Гәзиткә яҙылыу
9 Сентябрь 2025, 16:50
“Матбуғатһыҙ – донъя һанһыҙ!” – ти Рәйсә апай
Йылайырҙан гәзит-журналдарға яҙылып, затлы бүләк оттолар. "Оҙаҡ йылдар китапханасы булып эшләйем. Китапхана өсөн район гәзитенә генә яҙылырға аҡса бирҙеләр. Халыҡ уҡыйым тип инә, ә беҙҙә ваҡытлы матбуғат юҡ бит инде. Мәхрүм булмаһындар тип, “Башҡортостан”, “Киске Өфө” гәзиттәренә һәм “Һәнәк” журналына үҙем яҙылдым да квитанцияларын Матбуғат йортона ебәрҙем. Туңдырыу лары оттоғоҙ тип хәбәр иткәс тә – ышанманым. Әле бүләк өйөмә килеп инде. Шатлығымдың сиге юҡ!" – тип сығыш яһаны Йылайыр районы Яманһаҙ ауылында йәшәүсе Рәйсә Ҡашҡарова ауылдаштары алдында. Уға “Башҡортостан Республикаһы” нәшриәт йорто” акционерҙар йәмғиәте үткәргән “Яҙыл да бүләк от!” акцияһында ҡатнашып отҡан затлы техниканы Яманһаҙ ауылының мәҙәниәт һәм ял йортонда үткән осрашыуҙа “Башҡортостан” гәзитенең баш мөхәррир урынбаҫары Гөлназ Ҡотоева тапшырҙы.
“Матбуғатһыҙ – донъя һанһыҙ!” – ти Рәйсә апай
Рәйсә Әхмәҙулла ҡыҙы – өс бала әсәһе. Өс ҡыҙы ла ҡалаға китеп төпләнгән. Ире мәрхүм булып ҡалған. Хаҡлы ялда булыуына ҡарамаҫтан, китапханасы булып эшләп йөрөй.
“Һыйыр көтмәйем, әммә ҡырҙа йылҡыларыбыҙ бар, һуғым һуйһаҡ, ҡайҙа һалырға тип ҡайғыраһы түгел хәҙер. Ә гәзит-журналдарға килгәндә, өҙөлмәй яҙылырмын. Матбуғатһыҙ донъя һанһыҙ бит ул”, – тине ул, ауылдаштарын гәзит-журналдар алдырырға саҡырып.
Яманһаҙ – яҙыусы Зөлфирә Ҡаҙаҡбаева йәшәп ижад иткән ауыл. Ауылдан бик күп егеттәр әле МХО-ла. Ирекмәндәр көн дә мәҙәниәт һәм ял йортона маскировкалау селтәрҙәре үрергә йөрөй, гуманитар ылыу йыя. Был эштәрҙең башында ойоштороусы Фәрзәнә Йомағужина тора. Гөлназ Байбаҡтина, Рәзинә Байғужина, Лилиә Нурынбаева, Ғәйшә Аҡҡужина, Рабиға Таһирова, Гөлйемеш Иҫәндәүләтова, Сәлимә Моратова, Миңлегөл Йәйләүева, Рәйсә Әбделғафарова, Рәйсә Хәйризаманова, Венера Сыуашева, Рәйсә Ҡашҡарова, Гүзәл Моталлапова, Наталья Ивлева, Зөлфирә Ҡудашева, Айһылыу Вәлишина яугирҙәребеҙҙең ғүмерен һаҡлаусы, уларға бик кәрәкле селтәрҙәрҙе үрергә ихлас йөрөй.
“Башҡортостан” гәзите менән осрашыуға тип тап ошо әүҙем апай-һеңлеләр, яҡын-тирәләге ауыл советтары рәйестәре, район китапханасылары, уҡытыусылар, мәктәп уҡыусылары килгәйне. Йылайырҙың үҙешмәкәр композиторы Дамир Солтановтың, “Ауыл уттары” район гәзите мөхәррире Зөбәржәт Һиҙиәтованың, Яманһаҙ мәктәбе директоры Айһылыу Вәлишинаның, ауыл почтальоны Ғәйшә Аҡҡужинаның, Ҡашҡар ауыл биләмәһе башлығы Зөһрә Зәйнуллинаның сығыштары уйланырға мәжбүр итте, ошондай йылы осрашыуҙар йышыраҡ булһын ине, тип таралышты улар.
Автор фотолары.
- Рәйсә Ҡашҡароваға “Башҡортостан Республикаһы” нәшриәт йорто” акционерҙар йәмғиәте үткәргән “Яҙыл да бүләк от!” акцияһында ҡатнашып отҡан затлы техниканы тапшырҙыҡ.
- Бына улар – маскировкалау селтәре үреүселәр!
- Ауыл почтальоны Ғәйшә Аҡҡужина ауылдаштарын матбуғатҡа яҙылырға саҡырҙы.
- Осрашыуҙан һуң иҫтәлеккә фото.
- Рәйсә Ҡашҡарова “Башҡортостан” гәзитенә һәм “Һәнәк” журналына 2026 йылға ла яҙылып ҡуйҙы. Ә һеҙ яҙылдығыҙмы?
“Матбуғатһыҙ – донъя һанһыҙ!” – ти Рәйсә апай
Новости партнеров