"Бөтәһе лә батыр кешеләр"

Бөгөн Хөкүмәттең кәңәшмәһендә Башҡортостан Башлығы Радий Хәбиров алғы һыҙатҡа гуманитар йөк алып барған водителдәрҙе лә билдәләргә ҡушты.

– Кем был эштә ярҙам итә, бөтәһен длә билдәләргә онотмағыҙ, уларға ла рәхмәт әйтер кәрәк. Мәҫәлән, водителдәр, уларҙы ла бүләкләргә, ваҡытында рәхмәт әйтергә кәрәк. Улар бик батыр кешеләр, ул яҡҡа йөрөгәндәре өсөн афарин тип әйтәбеҙ, – тине Радий Фәрит улы.

Бынан тыш, Башҡортостан Башлығы махсус хәрби операцияла ҡатнашыусылар республиканан даими гуманитар ярҙам алырға тейешлеген тағы бер тапҡыр билдәләне. 2023 йылда тәүге гумконвой 19 ғинуарҙа махсус операция уҙғарыу зонаһына юлланды. Был юлы йөк тәү сиратта республиканың мобилизацияланған егеттәре һәм Салауат Юлаев исемендәге өсөнсө башҡорт батальоны хәрби хеҙмәткәрҙәре өсөн тәғәйенләнгәйне. Конвойҙы Башҡортостан Хөкүмәте вице-премьеры Ирек Сәғитов оҙатып йөрөнө. Уның менән бергә бер нисә район һәм ҡала башлыҡтары ла яҡташтарына юлланды.

Башҡортостан яугирҙәре палаткалар, буржуйкалар, йылы әйберҙәр, оргтехника, бөтә ерҙән дә үтә алған еңел автомобилдәр, мобиль мунсалар һәм башҡа кәрәкле әйберҙәр алды. Йөктө ҡаршы алған яугирҙәр республика етәкселегенә, уны булдырыуҙа әүҙем ҡатнашҡандарҙың һәммәһенә лә рәхмәт белдерҙе.

Фото: Башинформ.