Батыр үҙе үлһә лә, даны ҡала

Булыр бала – биләүҙән, ти халҡыбыҙ. Был һүҙҙәр Эске эштәр министрлығының  Башҡортостан буйынса идаралығы хеҙмәткәре, Миңлеғәле Шайморатов ордены кавалеры Илдус Хәлитов хаҡында әйтелгән.

Ҡаһарман йө­рәк­ле летчик 1951 йылдың 22 мартында Күгәрсен райо­нында тыуған. Ул бала саҡтан һәр эш­те урынына еткереп үтәүе ме­нән тиҫтер­ҙәренән айырылып торған. Мәк­тәпте алтын миҙал­ға тамам­лағас, Сыз­рань юғары хәр­би авиа­ция учи­лищеһына уҡырға инә.

Илдус Хәлитов хәрби юлын 1972 йылда совет ғәскәрҙә­ренең Германиялағы төр­көмөн­дә башлай. Экипаж, звено командиры, эскадрилья командиры урынба­ҫа­ры була. 1984 йылда уны Одесса хәрби округындағы штаб начальнигы урынба­ҫары һәм полк коман­дирының беренсе урынбаҫары итеп тәғәйен­ләйҙәр.

Ике йылдан һуң Афғандағы хәрби хәрәкәттәрҙә ҡатнаша: тәүҙә – Ҡабулда, һуңынан – Кундузда. “МИ-8” һәм “МИ-24” хәрби вертолеттарында оса. Хәрби осош тыныс булмай – һәр береһе ут аҫ­тында үтә, вертолеттың етди ваты­лыуҙар менән аэродромға әйләнеп ҡайтҡан осраҡтары ла була.

Илдус Хәлитов иҫәбендә – 426 хәрби осош. Уларҙың һәр бере­һенең фажиғәле тамамланыуы ихтимал булған, әммә яҡташыбыҙ хәрби машинаһы менән оҫта идара итеп, гел генә иҫән-һау ҡайтыу­ға өлгәшкән.

Ватанды һаҡлауҙа күрһәткән батыр­лыҡ­тары өсөн башҡорт летчигы Ҡыҙыл Байраҡ һәм Ҡыҙыл Йондоҙ ордендары менән бүләк­ләнгән. Бынан тыш, 2020 йылда тәүгеләрҙән булып генерал-майор Миңлеғәле Шайморатов ордены менән дә наградлана.

Ҡыҙғанысҡа ҡаршы, 2020 йыл­дың 22 июлендә Илдус Хәли­тов арабыҙҙан кит­те... Батыр үлһә лә, даны ҡала. Республи­ка халҡы ҡыйыу летчик менән лайыҡлы ғорурлана.

Рәмилә МУСИНА