Батырҙарыбыҙға – генерал Шайморатов ордены

5 ноябрҙә Иглин ауылында Башҡортостан Башлығы Радий Хәбиров һәләк булған хәрбиҙәрҙең – Иглин районынан махсус хәрби операцияла ҡатнашыусыларҙың Руслан Бәширов, Альфред Кәбиров, Виталий Коломасов, Алексей Кулаков, Максим Медведев, Владислав Михайлов, Владимир Пашенцев, Станислав Петрутик, Антон Пешков, Салауат Ғаязов, Михаил Дубровин һәм Денис Фәтхетдиновтың ғаиләләре менән осрашты.

Төбәк етәксеһе һәләк булған яугирҙәрҙең ғаиләләренең ауыр ҡайғыһын уртаҡлашты һәм күрһәткән батырлыҡтары, ҡаһарманлыҡтары өсөн үлгәндән һуң лайыҡ булған генерал Шайморатов орденын тапшырҙы.

– Һеҙҙең улдарығыҙ һәм ирҙәрегеҙ Тыуған илебеҙ өсөн ғүмерҙәрен бирҙе. Уларҙың һәр береһе үҙ бурысын аҙағына тиклем үтәне. Ысын геройҙарыбыҙ менән бар республика ғорурлана, – тине Радий Хәбиров. – Төп бурысыбыҙ – яугирҙәребеҙҙе хәтерләү, уларҙың исемдәрен мәңгеләштереү, ата-әсәләренә, ғаиләләренә һәм балаларына даими хәстәрлек күрһәтеү.

Башҡортостан Башлығы шулай уҡ Республика кардиология үҙәгендә МХО-ла һәләк булғандарҙың ата-әсәләрен һауыҡтырыу һәм реабилитациялау программаһы булыуын иҫкә төшөрҙө.

Һәләк булған яугирҙәрҙең әсәләре һәм тормош иптәштәре Радий Хәбировҡа иғтибары һәм хәстәрлеге өсөн рәхмәт белдерҙе. Шулай уҡ улар муниципалитет яғынан һәр ваҡыт ярҙам тойоуын билдәләне.

Иглин районы хакимиәте башлығы Гүзәл Насырова хәрби хеҙмәткәрҙәрҙең ата-әсәләре һәм ҡатындарының үтенестәре иғтибарһыҙ ҡалмай, тип өҫтәне. Һәләк булғандарҙың ғаиләләренә ауыл советтары һәм урындағы халыҡ ярҙам күрһәтә.

Фото: glavarb.ru