Алты йәшлек ҡыҙ бер йылда алты еңеү яулаған

Уға ни бары алты йәш, ә ул - рәсми рәүештә аккредитацияланған модель. Күптән түгел йәш һылыуҡай әсәһе Мөнирә Әмир ҡыҙы менән бөйөк дизайнерҙар Пьер Карден һәм В. Зайцев хөрмәтенә ойошторолған «World Beauty-2024» матурлыҡ, мода һәм талант фестиваленән ҡайтты. Был сарала ҡыҙ «Йәш Азия һылыуҡайы-2024» Гран-приһын алды. Фестиваль Мәскәүҙә 2 ноябрҙән 4 ноябргә тиклем үтте.

 — Тәүге көндә «Мисс Рәсәй» өсөн моделдәр һайлап алынды, әммә Әмирәнең һөҙөмтәләре шул тиклем тәьҫирле булды, уны халыҡ-ара ярышта ҡатнашыу өсөн һайлап алдылар, - тип һөйләне ҡыҙҙың әсәһе. Был сағыу матурлыҡ, мода һәм талант фестивалендә ун илдән 90-дан ашыу сибәр ҡыҙ ҡатнаша, улар араһында Франция, Эстония, Тажикстан һәм донъяның башҡа мөйөштәренән вәкилдәр була. Ҡатнашыусылар төрлө йәш категорияларынан: дүрт йәшлек ҡыҙҙарҙан алып өлкән ҡатын-ҡыҙҙарға тиклем. Өс көн дауамында конкурсанттар үҙҙәренең ижади һәләттәрен һәм оҫталыҡтарын күрһәтте.

Ҡыҙҙар милли, спорт, киске һәм дизайнер кейемендә сығыш яһаны. Һәр ҡатнашыусы үҙенең талантын ғына түгел, ә рух көсөн дә һынаны, ҙур сәхнәлә бәләкәй ватанының йөҙөн күрһәтә алды.

 - Был күләмле сарала беҙ халыҡ кейемдәренең матурлығына һәм традицияларҙы һаҡлауға һаҡсыл ҡараш булдырылыуға хайран ҡалдыҡ. Һәр ҡатнашыусы үҙенсәлекле образ тыуҙырып, үҙ халҡының фиғелен еткерергә һәм уның үҙенсәлектәрен күрһәтергә ынтылды, — тине Мөнирә Әмир ҡыҙы.   Башта Баймөхәмәтовтар, иң мөһиме - ҡатнашыу, сөнки был ҡиммәтле тәжрибә, тип ҡарар итә. Һөҙөмтәлә улар абруйлы конкурста Гран-приға лайыҡ була.

 Әмирә - «Березка» балалар баҡсаһы тәрбиәләнеүсеһе, киләһе йылда мәктәпкә бара. Конкурстарҙа ҡатнашыуҙың тәүге тәжрибәһен ҡыҙ “Һомай-Урал аръяғы" модель студияһында Зарина Йәнбирҙинанан ала, һуңынан уны Магнитогорскиҙа дизайнерҙар, хореографтар һәм башҡа белгестәр командаһы әҙерләй.

Мөнирә һәм Руслан Баймөхәмәтовтар ҡыҙҙарын төрлө яҡлап үҫтерергә тырыша. Дүрт йәшенән ул уҡый һәм яҙа, математиканы яҡшы белә, гимнастика менән шөғөлләнә һәм бассейнға йөрөй. Әмирәнең ваҡыты минутлап бүленгән: Ул Резеда Юлдашевала фольклор һәм Гөлназ Ғәбитовала хореография менән шөғөлләнә.

Ейәнсәре өсөн шиғырҙар яҙған өләсәһе Мәүҙиға Нәби ҡыҙы Әмирәлә туған телгә һөйөү тәрбиәләй. Улар бергәләп конкурстарҙа сығыш яһай. Жюри ағзалары Бөтә Рәсәй «Башҡортостан гүзәле-2024» матурлыҡ һәм йолалар конкурсында бергә сығыш яһауҙарын юғары баһаланы, унда йәш яҡташыбыҙ ҙа гран-при яуланы.

Әмирә Баймөхәмәтова, аккредитацияланған модель булараҡ, Мәскәүҙә «ГЛАВКИНО» кинотелевизион комплексында үтәсәк DMC MUSIC TV-ла Яңы йыл төнө телевизион концертында ҡатнашыуға саҡырыу алған. Телеконцертта Бөтә Рәсәйҙән модель һәм кейем дизайнерҙары ҡатнашыр тип көтөлә. Ул 31 декабрҙән 1 ғинуарға ҡарай төндә күрһәтеләсәк.

 «World Beauty-2024» матурлыҡ, мода һәм талант фестивалендә еңеү яулаған Әмирә Баймөхәмәтова аҡсалата сертификат һәм Сочи-Төркиә маршруты буйынса бер аҙналыҡ круиз менән бүләкләнгән. Октябрҙә Мәскәүҙә Әмирә Angela Miki һәм Turitsa донъя дизайн күрһәтеүҙәрендә ҡатнашҡан, «Иң яҡшы модель-2024» номинацияһында Im' Famous премияһы менән бүләкләнгән. Киләһе йылдың майында йәш яҡташыбыҙҙы шулай уҡ әһәмиәтле ваҡиға — Төркиәлә «Мисс донъя» конкурсында ҡатнашыу көтә. Уға уңыштар теләйбеҙ!

Авторы: Земфира Сәлимйәнова.
https://abzelil.com/articles/obshchestvo/2024-11-22/devochka-iz-bashkirii-za-odin-god-zavoevala-shest-koron-4019853