Һалдаттың ғаиләһе хаҡында хәстәрлек күрелә

Башҡортостанда махсус хәрби операцияла ҡатнашыусыларға, уларҙың ғаилә ағзаларына төрлө яҡлап ярҙам күрһәтелә. Был йәһәттән Ейәнсура районы хакимиәте етәкселеге лә әүҙемлек күрһәтә.

Ейәнсура районы хакимиәте башлығы Дәмин Юланов билдәләүенсә, Украиналағы махсус хәрби операцияла ҡатнашыусыларға һәм уларҙың ғаиләләренә ярҙам күрһәтеү – мөҡәддәс бурыстарҙың береһе.

Мәҫәлән, махсус хәрби операцияла ҡатнашҡан ил һаҡсыһының кәләше Дилбәр Фазлыева Үтәғол ауылында ғүмер итә, уға беҙҙәге ярҙам төрөнөң барыһы ла күрһәтелә. Беҙгә билдәле булыуынса, район етәкселеге Дилбәр Миңләхмәт ҡыҙын ярҙамдан өҙмәй, һалдаттың ғаиләһе тураһында даими хәстәрлек күрә. Утын менән тәьмин итеүҙәре, бесән алып килеүҙәре һәм башҡа ярҙам шуға асыҡ миҫал.

– Ейәнсура районы хакимиәте етәкселегенә рәхмәтемдән башҡа һүҙем юҡ, – ти Дилбәр ханым.

Дәмин Марат улының һүҙҙәренә ҡарағанда, көн дә беҙҙең егеттәребеҙ илебеҙҙең һәм уның граждандарының хәүефһеҙлеге һәм имен тормошобоҙ өсөн ғүмерҙәрен хәүеф аҫтына ҡуя. Ошондай батыр яҡташтырыбыҙҙың булыуы һәммәбеҙ өсөн дә ғорурлыҡ. Яҡташтарыбыҙҙың ғаиләләренә ярҙам киләсәктә тағы ла көсәйтеләсәк.

Фото: Ейәнсура районы хакимиәте сайтынан.