Ҡеүәттәрҙе яңыртыр саҡ

Был коллектив эшләп сығарған тултырма – республика өсөн башҡорт балы кеүек үк ҡәҙерле ризыҡ. Тирә-яҡта бөтә нәмә үҙгәрә, ә ул элеккесә ҡала – һаман да тәмле, тәбиғи һәм барыһы ла уны ярата. Өфөлә үткән “Агрокомплекс-2019” күргәҙмәһе лә шуны раҫланы: “Рощинский” совхозының продукцияһы беренсе дәрәжә дипломға лайыҡ булды.

– Беҙ хужалыҡты ҡабул ит­кән­дә, уның финанс хәле үтә ауыр ине: бурысы миллиард һум­дан ашҡан, хатта ҡыҫҡа ғына ваҡыт эсендә ул 600 миллион һумға үҫкән, – ти коммерция бу­йынса директор урынбаҫары Илшат Дәминев. – Сусҡалар һаны 50 меңдән 42 мең башҡа ҡалған, һуғым ауырлығы 70 килограмға саҡлы төшкән. Өс ай эсендә беҙ ошо күрһәткесте 103 килограмға еткерҙек, сусҡа көтөүе дүрт мең башҡа артты, ит эшкәртеү цехын сеймал менән етерлек дәрәжәлә тәьмин итә алдыҡ. Бөгөнгә ул тейешле режимда эшләй, әммә финанс мәсьәләләрен үҙаллы ғына хәл итә алмаясаҡбыҙ, өҫтәмә инвестициялар кәрәк.

Яңы етәксе республика Баш­лығы вазифаһын ваҡытлыса башҡарыусы Радий Хәбировҡа ярҙам һорап мөрәжәғәт иткән дә инде, ә Башҡортостан етәк­сеһе ризалыҡ биргән – Хөкү­мәт­кә ошо хужалыҡты бөлгөн­лөк­тән сығарыу һәм уның етеш­тереү ҡеүәттәрен аяҡҡа баҫты­рыу буйынса тәҡдимдәр эшләргә ҡушҡан.

Тәбиғи, предприятие үҙе лә ҡул ҡаушырып ултырмай. Фирма кибеттәрен ҡайтанан асалар, хатта уларҙың һанын элеккенән күберәк итергә лә уйҙары бар, сауҙа селтәрҙәре менән һөйлә­шеүҙәр алып барыла, “Роспатент”та үҙ сауҙа маркаһын теркә­гәндәр (ә быныһына күп йылдар дауамында өлгәшә алмағандар икән).

Декабрҙән алып “Рощинский”ҙа эш хаҡы ваҡытында би­релә башлаған. Әйткәндәй, совхозда бер кешене лә ҡыҫҡарт­ма­ғандар. Предприятиеның юға­ры һөнәри коллективы һаҡлан­ған һәм эшләргә теләге лә ҙур.

Күп предприятиеларҙан айыр­малы, бында үҙҙәренең һыуытылған сеймалы менән генә эш итәләр. Ситтән бер нәмә лә һатып алынмай: үҙҙәре иген сәсә, унан мал өсөн ҡатнаш аҙыҡ әҙерләй, мал үрсетәләр, ит­те һуйып эшкәртәләр, һәм ул фирма кибеттәрендә һатыла. “Шуға күрә нимәләлер һаҡсыл­лыҡ күрһәтеү­ҙең, арзан өҫтә­мә­ләр ҡулланыуҙың мәғәнәһе юҡ, беҙгә үҙ һимертеү комплексы биргән яңы һуйылған итте файҙаланыу отошлораҡ”, – ти етәкселек. Белгестәр аңлаты­уын­са, “баҫыуҙан кибет кәштә­һенә саҡлы” моделе етеште­реү­сенең дә, ҡулланыусының да мәнфәғәтенә берҙәй яуап бирә.

– Эш беҙҙең тултырманың һәй­бәт йәки насар булыуында түгел, – ти директорҙың коммерция мәсьәләләре буйынса урынбаҫары Илшат Дәминев. – Фәҡәт беҙ баҙарҙағы урынды кә­меттек, был иһә ит эшкәр­теү­ҙең сеймал базаһын тарай­тыуға, тимәк, етештереү күләмен дә аҙайтыуға бәйле. Сифатҡа кил­гәндә инде, ул элеккесә ҡалды. Беҙҙең маҡсат – үҙебеҙҙең игенде, итте, һөттө мөмкин тиклем тулыраҡ эшкәртеү һәм тәүге сиратта үҙ кибеттәребеҙ аша һатыу. Әлеге мәлдә беҙҙең 50 кибет эшләй, яңылары ла асыла.

Предприятиеның продукция­һы “Рәсәйҙең иң яҡшы 100 тауары” конкурсында даими рә­үештә еңеүселәр исемлегенә инә. Былтырғы “Алтын көҙ-2018” күргәҙмәһендә коллектив алты төр ризығын ҡуйҙы, һәм улар бөтәһе лә алтын миҙал яуланы.

Быйылғы йыл “Рощинский” совхозы дәүләт унитар ауыл хужалығы предприятиеһы өсөн юбилей осоро – декабрҙә сусҡа­сылыҡ комплексының эшләй башлауына 40 йыл тула.

Реклама.