Хәйбуллала яҙғы сәсеү тамам

Республиканың башҡа райондарында яуған ҡойма ямғырҙар Хәйбулла районын урап үтте. Көндәрҙең ҡоро тороуы ҡыҫҡа ваҡыт эсендә, атап әйткәндә, 25 көндә, сифатлы итеп сәсеү эштәрен башҡарып сығыуға булышлыҡ итте.

Сәсеү эштәре 90 мең 500 гектар майҙанда башҡарылды, был планға ҡарата 106 процент тәшкил итә. Майҙандың 79 меңдән ашыу гектарын иген культуралары биләй.

Шуныһы һөйөнөслө, һуңғы йылдарҙа район аграрийҙары иҡтисади табышлы культуралар сәсеүгә өҫтөнлөк бирә башланы һәм был үҙен тулыһынса аҡланы.

Бер-нисә хужалыҡ Таналыҡ, Бикбау хужалыҡтары, Урал Таймасовтың крәҫтиән (фермер) хужалығы сәсеү майҙанын күпкә арттырыуға өлгәште.

Хужалыҡтарҙың һәм КФХ-ларҙың матди-техник мөмкинлектәрен нығытыуға етди иғтибар бирелеүе баҫыу эштәрен тиҙ арала тамамларға мөмкинлек бирҙе. Ағымдағы йылда район хужалыҡтары 41 миллион һумға 42 берәмек техника һатып алды. Улар араһында өс яңы трактор, ике сәсеү комплексы, туғыҙ иген таҙартыусы машина һәм ер эшкәртеү ҡорамалдары бар.

Хәйбулла районы аграрийҙары быйыл мул уңыш үҫтереп алыр, Башҡортостан карауайына тос өлөш индерер тип ышанайыҡ. Тик ямғырҙар ғына урап үтмәһен.