Бергәнең эше ырамлы

– Әлегә тиклем көн матур торғас, мал аҙығын тырышып әҙерләнек, – тип һүҙ башланы ул. – Ямғыр яуҙы тип кәйеф төшә тиме. Ямғыр – ул бә­рә­кәт. Быйыл беҙҙе тәбиғәт иркәлә­мәне. Райондың башҡа ауылдарында ям­ғыр ҡойоп яуып үтһә лә, беҙгә ҡой­роғо ғына эләгә. Шуға ла бесән шы­йыҡ, тығыҙ түгел. Кисә ямғыр мул һибәләгәс, ҡыуаныстың сиге булманы. Баҫыуҙар бер аҙ һурыҡҡансы тип техниканы ҡарап алырға булдыҡ. Бына әле генә “Беларусь”тың тәгәрмәсен алмаштырҙыҡ.

Атанан күргән – уҡ юнған, тип хаҡ әйткән халыҡ. “Мифтахов” крәҫтиән (фермер) хужалығы уңғандары менән танышҡас, был һүҙҙең хаҡлығына тағы бер ҡат инандым.

Яҙмышын ауыл хужалығы менән бәйләргә хәл иткән Зөбәржәт һәм Рафаил Кушнаренко ауыл хужалығы техникумында осраша. Йәштәр икеһе лә агроном һөнәренә уҡырға килгән. Ҡулдарына диплом алғас, егеттең тыуған яғы – Иҫке Бәпес ауылына ҡайтып төпләнәләр. Йәштәр Карл Маркс исемендәге колхозда хеҙмәт юлын башлай. Рафаил ағай агроном булып, ә Зөбәржәт апайҙы бер ни ҡәҙәр ваҡыт­тан һуң колхоз идараһына эшкә алалар. Уңған ғаиләлә өс ул, бер ҡыҙ ауыл эшен белеп, өйрәнеп үҫә. Мәк­тәпте тамамлағас, егеттәрҙең бөтәһе лә Башҡортостан дәүләт аграр университетын һайлай. Бер аҙҙан Рафаил ағай хужалыҡты улы Ришатҡа ышанып тапшыра.

Хужалыҡ һыйыр малы үрсетеү, үҫемлекселек менән шөғөлләнә. Бө­тәһе 150 баш һыйыр малы аҫрала. 612 мең гек­тар ерҙә арыш, бойҙай, арпа, ҡа­рабойҙай, көнбағыш үҫтерелә, 107 гектарҙа бер йыллыҡ үлән сәселгән.

...Төштән һуң ҡояш бесәнлектәрҙе киптерҙе. Тамаҡ ялғап алған егеттәр йәнә көр кәйеф менән баҫыуға ашыҡты. Руслан “Беларусь”ында үләнде сапһа, Сәлих Хәлитов йыя. Ә Айрат Абнасиров яҫма­ларҙы төргәккә һала. Әҙер бесәнде Рөс­тәм “КамАЗ”-да фермаға ташый баш­ланы.