Учалыла эштәр көйлө

Ҡала хакимиәте башлығы Ильяс Килмөхәмәтов белдереүенсә, Учалыны төҙөкләндереү буйынса бик күп эш башҡарыла.

– 19 күп ҡатлы йортта капиталь ремонт яһалды, 69 подъезд яңы төҫ алды. “Башҡорт ихаталары” программаһына ярашлы, быйыл ете ихата төҙөкләндерелә, – тине ул.

Ҡалалағы был үҙгәрештәргә халыҡ бик шат. Әлеге ваҡытта Мортазин урамындағы ихаталарҙың береһе төҙөкләндерелә икән.

– Беҙҙең йорт бик иҫке, “хрущевка”лар урынлашҡан бында. Ихатабыҙ ҙа ҡурҡыныс хәлдә ине. Программаға эләккәс, ул күҙгә күренеп үҙгәрҙе. Әле туҡталҡа урыны әҙерләнде, бордюрҙар ҡуйылып бөттө. Ошо арала балалар майҙансығы урынлаштырылыр тип ашҡынып көтәбеҙ, – тине был йортта йәшәгән Сания исемле ханым.

Ә Ленин урамы, 48 А һанлы йорт халҡы тирә-яғын матурлауҙы үҙ ҡулына алған.

– Беҙ йортобоҙ менән кәңәшләштек тә “Өлгөлө йорт” конкурсында ҡатнашырға булдыҡ. Кемдер картиналар сығарып элде, кемдер тәҙрә төбөнә гөлдәр ҡуйҙы. Сәскәләр ултыртып, тирә-яҡты таҙарттыҡ, иҙәнде буяныҡ. Матур ерҙә матур итеп йәшәге килә, – ти кешеләр.

Йыйында халыҡ үҙен ҡыҙыҡһындырған һорауҙарҙы биреп, уларға яуаптар алды. Барлыҡ проблемаларҙы уртаға һалып һөйләшеү ике яҡ өсөн дә файҙалы булды тигән фекерҙә унда ҡатнашҡандар.

Алдағы көндәрҙә муниципаль йыйындар бөтә ҡала һәм райондарҙа уҙғарыласаҡ. Халыҡ менән осрашыу тураһындағы мәғлүмәт хакимиәттең рәсми сайтында урынлаштырыла.

Бөгөн “Управдом” форумы Өфөнөң Ленин һәм Калинин райондарында, шулай уҡ Ағиҙел һәм Нефтекама ҡалаларында үтә.

Фото: БР Башлығы матбуғат хеҙмәте.