+34 °С
Ясно
Иҡтисад
10 Сентября 2019, 06:03
Ҡояш алып килгәнгә ҡыуандылар
Класташымдың “күршемдең егәрлелегенә шатланып бөтә алмайым, һәр йәһәттән дә ул миңә өлгө, бер үк ваҡытта сәм дә өҫтәй” тигән һүҙҙәре иҫкә төштө. Быны “Жнейкин” ауыл хужалығы кооперативына юлланғанда Миәкә районының ауыл хужалығы бүлеге начальнигы Илдар Хәсәнов менән булған һөйләшеү ҙә нығытып ҡуйҙы. Бындағы тәртип һәм таҙалыҡтан күҙҙәр ҡамаша.
Класташымдың “күршемдең егәрлелегенә шатланып бөтә алмайым, һәр йәһәттән дә ул миңә өлгө, бер үк ваҡытта сәм дә өҫтәй” тигән һүҙҙәре иҫкә төштө. Быны “Жнейкин” ауыл хужалығы кооперативына юлланғанда Миәкә районының ауыл хужалығы бүлеге начальнигы Илдар Хәсәнов менән булған һөйләшеү ҙә нығытып ҡуйҙы. Бындағы тәртип һәм таҙалыҡтан күҙҙәр ҡамаша.
– Илсеғолдар һоҡландыра, был яҡтарҙағы уңғандарҙы бүтәндәргә һәр саҡ өлгө итеп ҡуябыҙ, – ти Илдар Вәсим улы. – Улар ялан-ҡырҙа ла алдынғылыҡты бирмәй, үҙҙәренең донъяһы ла ныҡлы, етеш йәшәйҙәр.
“Жнейкин” хужалығы ураҡты тамамлау алдында. Игенсе яуында тыныр, тибеҙ. Һуңғы көндәрҙәге туҡтауһыҙ ямғырҙар эшкә әҙме-күпме тотҡарлыҡ яһаған-яһауын, әммә етәкселек ваҡытлыса килеп сыҡҡан “тәнәфес”те үҙенең файҙаһына борған. Әлбиттә, техниканы йүнәтеп, төҙөк тотоу күҙ уңында тотола.
Кооперативта ырҙын табағы өсөн яуаплы булған, халыҡса әйткәндә, ток мөдире Заһир Расаевтың һүҙҙәренә ҡарағанда, иген культураларының гектар ҡеүәте яҡынса район күрһәткесе менән бер тиң, бында гектарынан 17 центнер уңыш алалар. Әле арпа йыйыу башланған. Игенселәр уның бер бөртөгөн дә баҫыуҙа ҡалдырмау өсөн бар көсөн һала.
Хужалыҡ идараһы Илсеғолда урынлашҡан, тағы ла уға Нарыҫтау менән Сергеевка ауылдары ҡарай. Әллә күпме кешенең бында үҙенә эш табыуы, һис һүҙһеҙ, ҡыуаныслы. Хужалыҡ рәйесе Роман Жнейкин әйтеүенсә, тәү маҡсаттарҙың береһе – хеҙмәткәрҙәргә заманса эш шарттары булдырыу, хеҙмәт хаҡын ваҡытында түләү.
Кооператив эшмәкәрлеген ике йүнәлештә – үҫемлекселек һәм малсылыҡ буйынса көйләгән. 1 300-гә яҡын һыйыр малы улар өсөн сик түгел, киләсәктә уны тағы ла арттырырға уйлайҙар. Шуның 360-ы – һауын һыйыры, бынан тыш, 160 йылҡы малы бар.
Бер нисә йыл элек һөттө “Белое облако” һөт компанияһына тапшырғандар, әле продукцияны Бөрө ҡалаһында урынлашҡан “Башҡорт һөтө” йәмғиәте ҡабул итә.
Ураҡтың бик ҡыҙыу ойошторолоуы Илгизәр Талипов, Рәмзил Илекәев, Илнур Зиангиров, Әхәт Шәрипов һәм башҡа уңғандарҙың ныҡышмалылығына туранан-тура бәйләнгән. Егеттәр техниканы биш бармағы кеүек яҡшы белә.
Ерҙе туңға һөрөүгә әҙерлектең яҡшы барыуын да күрҙек. Ә унан алда ужым сәсә башлағандар. Ошо көндәрҙә был эшкә лә нөктә ҡуймаҡсылар. Планға ярашлы, 650 гектар майҙанда сәсеү эштәрен башҡарырға тейеш улар.
Роман Жнейкин үҙ бүлмәһенә эшлекле тәҡдим менән инеүселәрҙе һәр саҡ хуплай. Ерҙе эшкәртеүгә көстө ни тиклем йәлләмәйһең, ул һиңә уңышты шул хәтлем мул бирәсәк, тип йыш ҡабатлай. “Тир түккән – етеш йәшәгән” тигән мәҡәлде тормош девизы итеп алған. Халыҡҡа шөғөл булһын, ғаилә башлығының һәр береһе үҙен ысын ир итеп тойһон – бына иң беренсе нимәләр борсой етәксене.
Болоттарҙың ҡиблаға табан йүгереүен, һирәк булһа ла асылған күкте күргән Заһир Зәбир улы, тимәк, тиҙҙән көндәр аяҙаясаҡ, һеҙ беҙгә ҡояш алып килдегеҙ, тип йылмайҙы. Ғөмүмән, ураҡсылар һәр аяҙ көндөң ҡәҙерен белеү, уны файҙалы итеп үткәреү яҡлы.
Айрат Нурмөхәмәтов фотоһы
