Илке-һалҡы эштәрҙе ҡабул итергә ярамай

Башҡортостан Хөкүмәте Премьер-министры урынбаҫары – торлаҡ-коммуналь хужалыҡ министры Борис Беляев муниципаль берәмектәр башлыҡ­тары менән видеоконференция форматында “Башҡорт ихаталары” республика програм­маһын һәм “Уңайлы ҡала мөхитен булдырыу” төбәк проектын тормошҡа ашырыу мәсьәләләре буйынса кәңәшмә уҙғарҙы.

Борис Беляев әйтеүенсә, был тема бик мөһим. “Ҡала һәм район хакимиәттәре баш­лыҡтары эштәрҙе сифатһыҙ башҡарған намыҫһыҙ подряд­сы­ларға ҡарата ҡаты мөнәсәбәт яҡлы булырға тейеш. Илке-һалҡы атҡарылған эштәрҙе ҡабул итергә ярамай. Барлыҡ нормаларға ярашлы сифатлы башҡарылған һәм эштәр тамам­ланған райондарҙа подрядсы ойошмаларға ваҡытында ту­лыһынса аҡсаларҙы күсереүҙе тәьмин итергә кәрәк”, – тине сығыш яһаусы.

Әлегә “Башҡорт ихаталары” йорт яны биләмәләрен комплекслы төҙөкләндереү республика программаһын ғәмәлгә ашырыу маҡсатында 101 ихатала эштәр тулыһынса теүәл­ләнгән, 303 объектта төҙөлөш бара, улар араһынан 48 ихатаға балалар өсөн уйын ҡорол­маларын килтереүҙәрен кө­тәләр. “Уңайлы ҡала мөхитен булдырыу” төбәк проекты буйынса иһә бөгөнгә 134 объектта эштәр – 90 – 100, 27-һендә 70 – 90 процентҡа та­мам­ланған тиерлек.

Кәңәшмә барышында Хөкү­мәт Премьер-министры урын­баҫары ҡала һәм район баш­лыҡтарына “Башҡорт ихаталары” республика про­грам­маһы буйынса ошо арала графикка ярашлы барлыҡ муниципалитеттар 2020 йылғы объекттарға (ихаталарға) смета документтарын яҡларға һәм тейешле бөтә документтарҙы тап­шырырға тейеш булған­дарын иҫкәртте. Киләһе йыл програм­маһына ингән ихата­ларҙың адресы тураһында мәғлүмәт хакимиәттәрҙең сайттарында урынлаштырылырға тейеш.