Һәр мәсьәлә эҙмә-эҙлекле хәл ителә

Ә Башҡортостандың Тариф буйынса дәүләт комитеты рәйесе Светлана Бурдюк коммуналь хеҙмәт­ләндереү хаҡтарының быйыл нисек үҙгәрәсәге тураһында һөйләне, һәм ул күрһәткән слайдтарҙа түбән­дәгеләр сағылдырылды: һыу менән тәьмин итеү быйылғы 1 ғинуарға ҡарата кубометрына 25,68 һум булһа, 1 июлгә ул 26,45 һум булыр тип күҙаллана, йәғни был коммуналь түләү өс процентҡа артасаҡ. Һыу ағыҙыу (ҡулланылған һыуҙы кана­лизацияға ҡабул итеү) хаҡы үҙгәрешһеҙ ҡала – 1 июлгә ул элеккесә кубометрына 30,59 һум буласаҡ. Йылылыҡ энергияһы 2019 йылдың беренсе ярты йыл­лығында бер гигакалория өсөн 2092,32 һум һәм икенсе алты айлыҡта 2134,16 һум булһа (йәғни ике процентҡа артһа), быйылғы тәүге ярты йылда ошо коммуналь хеҙмәт былтырғы йыл аҙағындағы кимәлдә ҡала, ә икенсе ярты йылда был хаҡ 2198,18 һум тәшкил итәсәк – өс процентҡа күтәреләсәк. Электр энергияһына хаҡтар 1 июлдән алып түбәндәгесә буласаҡ: ҡалала йәшәгән һәм электр плитәһе ҡулланмаған халыҡ өсөн көндөҙ – бер киловатт-сәғәтенә 3,83 һум, төнөн – 2,66-шар һум; электр плиткәһен файҙаланғандар һәм ауылда йәшәгәндәр өсөн көндөҙ – 2,68 һум, төнөн – 1,86 һум. Газ өсөн хаҡтар түбәндәгесә: зәңгәр яғыулыҡ­ты ашарға бешереү һәм газ менән эшләгән һыу йылытҡысты ҡулланыу өсөн тотоноусылар – быйылғы тәүге ярты йыллыҡта бер кубометрға 7,20 һум, ашарға бешереү һәм үҙәкләш­терелгән йылытыу үткәрелмәгән йорттарҙа газ менән эшләгән һыу йылытҡысты ҡулланыу өсөн тотоноусылар 6,71-әр һум түләй.

Светлана Николаевна әйтеүенсә, коммуналь хеҙмәтләндереү өсөн тарифтар былтыр ике тапҡыр үҙгәр­телгән һәм уларҙың иҡтисади яҡтан халыҡ өсөн мөмкин тиклем ҡулайлыраҡ булыуы контролдә тотола. Дәүләт комитеты рәйесе шулай уҡ ҡаты коммуналь ҡалдыҡтар өсөн түләү мәсьәләһенә лә туҡталды: был хеҙмәтләндереү хаҡы былтырғы декабрь кимәлендә ҡаласаҡ. Бөгөнгө тариф – йәғни һәр кубометр ҡалдыҡ өсөн 70-әр һәм 35-әр һум – хатта Дәүләт комитеты тарафынан билдәләнгән кимәлдән дә түбәнерәк.

– Транспорт буйынса тариф­тар­ҙы тикшергәндә, хәтерләй­һегеҙме, пассажирҙар ағымы артырмы икән тип борсолғайныҡ, – тине Радий Фәрит улы ошо мәсьәләне тикшер­гәндә. – Был күрһәткес яҡшыра, ти­мәк, тариф иҡтисади яҡтан нигеҙ­ләнгән.

Күп кенә үҫмерҙәрҙең ағыула­ныуына килтергән “снюс”тар буйынса мәсьәлә беренсе тапҡыр күтәрелмәй. Кәңәшмәлә әйтелеүенсә, был хәүефле күренешкә Башҡортостан беренсе булып ҡаршы сыҡты һәм Дәүләт Йыйылышы – Ҡоролтай депутаттары уларҙы һатыуҙы тыйыу тураһында закон да ҡабул итте. Хәҙерге мәлдә республика парламенты уны федераль закон проекты итеп Дәүләт Думаһына тәҡдим итергә әҙерләй. Контрафакт продукция тураһындағы мәсьәлә күтә­релгәс, Радий Фәрит улы былай тине: “Телевидение барып, ошо контрафакт продукцияһы табылған складтарҙы төшөрһөн әйҙә, халыҡ күреп-белеп торорға тейеш”.

Бынан тыш оператив кәңәшмәлә “Башҡортостан Республикаһында бәләкәй һәм урта эшҡыуарлыҡтың үҫеше һәм уға ярҙам” дәүләт програм­маһының үтәлеше, мәктәп­тәрҙә балаларҙы туҡландырыу сифаты, “Сколково” фонды менән Нефтекама ҡалаһы хакимиәте ара­һындағы энергоменеджмент буйынса берлектәге проект, көҙгө хәрби хеҙмәткә саҡырыуҙың йомғаҡтары һәм һаулыҡ һаҡлауҙы кадрҙар менән тәьмин итеү программаһы ҡаралды.

Радий Фәрит улы һәр мәсьәләгә айырым туҡталып үтте. Мәктәп уҡыусыларын ашатыу буйынса контроль идаралығы биргән мәғлүмәт­тәргә ҡарата ул шулай тине:

– Беҙ мәктәптәрҙә Башҡорт­остандан һәм Рәсәйҙән кил­тереллгән ризыҡтың нисбәтен ҡараныҡ, ике район мине ғәжәпкә ҡалдырҙы. Өфө һәм Кушнаренко райондары мәк­тәптәрендә республикала етеш­терелгән аҙыҡты бөтөнләй фай­ҙаланмайҙар. Кушнаренко районында мәктәп ашханаһында Мәскәү өлкәһенең Люберцы районынан килтерелгән ит блогын һәм Бразилиянан алынған туңдырылған һыйыр итен ҡулланалар. Нимә ашаталар беҙҙең балаларға? Контроль ида­ралығы тағы бер тапҡыр тик­шерһен, район хакимиәте баш­лы­ғының үҙ вазифаһына тура киләме-юҡмы икәнен хәл итәсәкмен. Был иҫкәртеү Өфө районына ла ҡағыла. Мәктәптә нисек ашатыуҙарын даими контролдә тотасаҡбыҙ.

Римма Бойцова,