“Һеҙгә һәр йәһәттән ярҙам итербеҙ!”

Проекттың инициаторы, “Торгпромупаковка” компанияһы директоры Руслан Фәйзуллин ошо көндәрҙә төбәк етәксеһенә Башҡортостанда этил спирты нигеҙендә дезинфекциялау саралары сығарыу тәҡдиме менән мөрәжәғәт иткәйне. Инвестор Өфө биләмәһендәге производствоға 30 миллион һум аҡса йүнәлтергә әҙер.

– “Инвестиция сәғәте”нә тиҙ арала эләгә алыуыбыҙға аптырап ҡалдыҡ, – тине Руслан Фәйзуллин. – Етештереүҙе ойоштороу өсөн рөхсәт документтарын алыу һәм ҡорамалдар һатып алыуға сығымдың бер өлөшөн субсидиялау йәһәтенән ярҙам кәрәк.

Башҡортостан Башлығы Хөкүмәткә проектҡа булышлыҡ итергә, шул иҫәптән юл картаһын төҙөүҙә ярҙам күрһәтергә ҡушты.

– Башҡортостан иҡтисадына инвестиция һалырға һәм халыҡҡа кәрәкле производство асырға әҙер булһағыҙ, рәхим итегеҙ! Һеҙгә һәр яҡлап ярҙам итербеҙ, – тине Радий Хәбиров.

Кәңәшмәлә ҡатнашыусылар шулай уҡ Йәрмәкәй районында “Семен-Макар” малсылыҡ комплексы төҙөлөшөн тикшерҙе. Республика Инвестиция комитеты тарафынан хупланған 2,95 миллиард һумлыҡ проект 2018 йылда тормошҡа ашырыла башлаған. Әле бында һыйыр аҙбарҙары, ике һөт һауыу блогы төҙөлгән. Комплексты быйыл июнь аҙағында файҙаланыуға тапшырыу күҙаллана.

– Был – төбәктәге агросәнәғәт комплексында иң ҙур технологик проекттарҙың береһе. Республикала башҡа бындай комплекс әлегә юҡ, – тине вице-премьер – ауыл хужалығы министры Илшат Фәзрахманов.

Фекер алышыу һөҙөмтәһе буйынса проект өҫтәмә ярҙам сараһына эйә булды – төҙөлөшкә һәм инженерлыҡ инфраструктураһына сығымдың бер өлөшө субсидияланасаҡ.

“Траст-Инвест” етештереү компанияһы Краснокама районында Арлан керамик кирбес заводын яңыртырға ниәтләй. Инвестиция күләме 155 миллион һум тәшкил итә. Бынан тыш, предприятие продукцияһын һатыу йәһәтенән дә ҡыйынлыҡ кисерә икән. Радий Хәбиров Башҡортостан Хөкүмәтенә республика төҙөүселәре менән хеҙмәттәшлек алымдарын ҡарарға ҡушты. Предприятиеға шулай уҡ мөлкәткә һәм табышҡа һалым буйынса ташлама биреләсәк.

“Тере һыу” йәмғиәтенең финанс директоры Тимур Күскилдин Ғафури районындағы “Красноусол” эсәр һәм минераль һыуын етештереүҙе үҫтереү ниәтен белдерҙе.

– Продукциябыҙҙы Рәсәй баҙарына сығарырға, федераль селтәрҙәр, ҡойоу автоматтары аша һатырға теләйбеҙ. Ошо рәүешле республиканың күп кенә райондарын сифатлы эсәр һыу менән тәьмин итеү мәсьәләһен хәл итә алабыҙ, – тине ул.

Проект өҫтөнлөклөләр статусын алды. Уға шулай уҡ һалым ташламаһы бирелә.

Фото: glavarb.ru