Кооператив берләштерә лә, эшләтә лә...

2019 йылдың йәйендә асылған кооперативҡа бөгөн 12 крәҫтиән (фермер) хужалығы етәкселәре, шәхси ихатаһында мал, ҡош-ҡорт аҫраған, йәшелсә үҫтергән хужалыҡтар ингән. Бынан тыш айырым кешеләр ҙә үҙҙәренән артып ҡалған про­дукцияһын ошо кооперативҡа тапшыра. Нәҡ экологик яҡтан таҙа, сифатлы продукциянан аҙаҡ ит һәм ярымфабрикаттар цехында төрлө продукция етештерелә.

Кооператив менән уңған, бөтмөр, талапсан һәм киләсәген алдан ҡайғыртыусы Рәлис Мәхийәнов етәкселек итә. Рәлис Мөҙәрис улы ауыл хужалығын биш бармағындай яҡшы белә. Оҙаҡ йылдар үҙе лә крәҫтиән (фермер) хужалығы менән етәк­селек итә. Бер туған ағалары ла – ер кешеләре, малсылыҡ өл­кә­һен­дә лә уңыш ҡаҙанғандар.

– Әлбиттә, кооперативҡа берләшеү тәүге осорҙа нисектер ауыр күренһә лә, аҙаҡ яйлап өйрәнелде. Шөкөр, бөгөн беҙҙең эшмәкәрлегебеҙ тураһында районда ғына түгел, ә республика кимәлендә лә яҡшы беләләр, – ти Рәлис Мөҙәрис улы. – Эшкәрт­кән продукцияға халыҡ­та ихтыяж ҙур, һәр ерҙә яратып һатып алалар. Минеңсә, ошондай ихтыяж булғас, беҙҙең хеҙмәтебеҙ бушҡа китмәгән.

Бөгөн кооперативтың ит эшкәртеү һәм етештереү цехы райондың элекке мал һуйыу цехында урынлашҡан. Әлбиттә, элекке ташландыҡ бинаны бөгөн танымаҫһың да: кооператив ағзалары үҙ көстәренә матур итеп ремонт үткәргәндәр, хеҙ­мәт­кәрҙәрҙең эш шарттары ҡа­ланыҡынан һис тә ҡалышмай. Шуныһы ҡыуаныслы: кооператив бөгөн республика, район етәкселеге яғынан һәр яҡлап ярҙам һәм таяныс тойоп йәшәй һәм эшләй. Мәҫәлән, 2019 йыл­дың сентябрендә республика бюджетынан “Миәкә” кооперативы өс миллион һумға яҡын Грант алыуға өлгәшкән. Дәү­ләт­тән бүленгән был ярҙамға һәм үҙҙәренең 300 мең һум аҡса­һын да өҫтәп, улар әҙер продукцияны магазиндарға, сауҙа нөк­тәләренә таратыу өсөн һыуыт­ҡысы булған еңел автомобиль һатып алған. Бынан тыш ит­те эшкәртеү өсөн ҡеүәтле ҡо­рол­малар һатып алыуға өлгәш­кәндәр. Бөгөн кооператив эш­сәндәре заманса ауыл хужалығы ҡоролмаларында ит, төрлө ярымфабрикаттар етештерә. Бында ҡул көсө бөтөнләй ҡул­ланылмай тиерлек, эшмә­кәр­лек, нигеҙҙә, автоматлаш­тырылған.

Кооперативҡа берләшеү, әлбиттә, халыҡтан, хужалыҡ­тарҙан ит йыйыу һәм уны эшкәртеү проблемаһын ыңғай хәл итәсәк. Ә ит эшкәртеү це­хының булыуы иһә продукция йыйыуҙың географияһын ки­ңәйтәсәк, бынан тыш яңы ауыл хужалығы продукцияһы етеш­тереүселәрҙе йәлеп итәсәк.

– Көслө конкурентлыҡ осоронда продукцияның сифатына ҙур иғтибар бүлергә тырышабыҙ, сөнки бөгөн ит етештереү һәм эшкәртеү баҙары айырыуса ныҡлы үҫешкән, – ти кооператив рәйесе Рәлис Мөҙәрис улы. – Бөгөн был кооперативты ойоштороп, беҙ күпме кешене эш урындары менән тәьмин иттек. Киләсәктә лә эшмә­кәрлегебеҙҙе матур итеп дауам итәсәкбеҙ, ә бының өсөн бөтә уңайлы шарттар бар, яңы мөмкинлектәргә юл асасаҡбыҙ.

Кооперативтың ит эшкәртеү цехында бөгөн 50-гә яҡын ярымфабрикат етештерелә: бил­мән, манты, вареник, кәт­лит, голубцы, тефтели, сейбөйөрөк, бишбармаҡ, хинкали, курник, фрикадельки, люля-кебаб, ваҡ бәлеш­, самса һәм башҡа төр продукция. Бынан тыш туҡмас, һалма, ҡаҙылыҡ, үткәрелгән иттән дә ауыҙ итергә була. Күптән түгел йылҡы итенән дә билмән етештерә башлағандар.

Кооператив етештергән бөтә төр продукция район үҙәге магазиндарына, сауҙа нөктәләренә, Өфө ҡалаһына оҙатыла. Күп кенә осраҡта ит продукцияһы заказ буйынса етештерелә.

– Шөкөр, беҙҙең продукцияға халыҡ араһында ихтыяж бар, булды һәм буласаҡ, сөнки беҙ фәҡәт тәбиғи сеймал ғына ҡулланырға тырышабыҙ. Экологик яҡтан саф, таҙа продукцияны киләсәктә лә етештереүҙе дауам итәсәкбеҙ, – ти кооператив рәйесе Рәлис Мәхийәнов.