Сифатлы майға сират

Миәкә районынан шәхси эшҡыуар Илшат Мусин етәксе­легендәге “Миәкә натур продукт” етештереү компанияһы, мәҫәлән, көнбағышты эшкәртеү һәм көнбағыш майы, төпрә, таҙартылған көнбағыш һатыу менән 1998 йылдан алып шөғөлләнә.

Предприятие бөгөн аяғында ныҡлы баҫып торған­дарҙан һанала. Эшкәртеү баҙарында эшләү дәүерендә йәмғиәт үҙен ныҡлы үҫешкән, тотороҡло һәм абруйлы итеп танытып та өлгөргән. Бында әле көнбағышты эшкәртеп, унан шыйыҡ май етештереп, 1 һәм 1,5 литрлы, 5 литрлы пластик һауыттарға тултырып, район, республика ҡулланыусыларына оҙата. Нигеҙҙә, экологик яҡтан таҙа, сифатлы продукцияны күмәртәләп һатыу юлға һалын­ған. Бында таҙар­тылмаған, рафинадланмаған май етеш­терелә. “Белгестәр майҙың сифатын даими тикшереп тора, сөнки бөгөн сифатын юғалтһаҡ, иртәгә ҡулланыусылар башҡа продукцияны үҙ итәсәк”, – ти Илшат Мусин.

Төпрәне иһә ҡатнаш мал аҙығы етештереү менән шөғөл­ләнгән ойошма-предприятиелар ҙур ихласлыҡ менән һатып ала.

Әле бында көнөнә 20-25-әр тонна көнбағыш эшкәртелә, әҙер продукция рәүешендә ҡулла­ныу­сылар өҫтәленә барып ята.

– Май өсөн көнбағыш фәҡәт республиканың экологик яҡтан таҙа райондарында үҫтерелгән хужалыҡтарынан һатып алына. Иң тәүҙә орлоҡтар өҫтәмә эш­кәртеүгә дусар ителеп кипте­релә, таҙартыла, – ти Илшат Хәй­ҙәр улы. – Шөкөр, бөгөн эшмәкәрлегебеҙҙе юғары баһа­лайҙар, продукциябыҙҙы яратып һатып алалар. Был продук­цияға ихтыяж һәр саҡ ҙур, үтемле лә.

Бөгөн инде ҡасандыр буш ятҡан ерҙәр тәрбиәле, предприятиены әле ҙур завод менән сағыштырырға була. Йәмғиәт етештергән әҙер продукция келәттә оҙаҡ ятмай, Миәкә майын күрше төбәктәрҙә лә яҡшы беләләр. Мәҫәлән, сифатлы, тәбиғи продукцияны Ырымбур, Силәбе эшҡыуарҙары күмәр­тәләп һатып ала, күрше райондар, ҡалалар халҡы ла нәҡ эшҡыуар Илшат Мусиндың майына өҫтөнлөк бирә. Хәҙер эшҡыуар һыҡҡан майҙы бөтә республикала һатып алырға мөмкин.

Көнбағыш майы һығыу цехына Илнур ҡышҡылыҡҡа запасты ла мул ғына туплай, сөнки май һығыу йыл әйләнәһенә дауам итә бит. Эшҡыуар ете кешегә эш урыны булдырған. Хеҙмәт хаҡына бында зарланмайҙар, теләүселәр эш хаҡын әйберләтә лә ала. Ҡыҙыу осорҙа килешеү буйынса бер нисә кешене эшкә йәлеп итәләр.

Цехта бөгөн ҡыҙыу осор. Май һығыусы операторҙар ҡоролма­ларҙың ватылмай эшләүен тәьмин итә, цех асылған көндән бында эшләүсе Хәлимә Шәймәр­ҙәнова менән Азат Ҡотләхмәтов продукцияны пластик һауыт­тарға тултыра.

Шуныһы ҡыуаныслы: шәхси эшҡыуар 2019 йылда өс миллион һумға яҡын Грант алыуға өлгәшкән. Бынан тыш, үҙҙә­ренең 500 мең һумын да ҡушып, эшмәкәрлектәрен алып барыу өсөн тотонғандар. Былтыр, мәҫә­лән, ҡеүәтле орлоҡ киптергескә эйә булғандар. Әле ҡоролманы көйләп, орлоҡ киптергес операторы Радик Вәлиәхмәтов уны эшкә ҡушырға йыйына. Әйт­кән­дәй, бында эшләү өсөн уңай­лы шарттар булдырылған. Ашханаһы ла, йыуыныу бүлмәләре лә бар.

– Яҙмышымды ауыл менән бәйләүемә үкенмәйем, яратҡан шөғөлөм бар, тырыш хеҙмәт­кәрҙәрем етерлек. Етмәһә, республика, район етәкселеге лә ярҙамынан өҙмәй. Ә бындай иғтибар булғас, әлбиттә, уңған­лыҡ күрһәтергә тейешбеҙҙер инде, – ти эшҡыуар Илшат Мусин.