Үҙебеҙҙе лә тәьмин иттек, һатыуға ла күп

Быйыл, коронавирус пандемияһына ҡарамай, ауыл хужалығы тармағы юғары уңыштары менән ҡыуандыра. Республиканың агросәнәғәт комплексы үҫемлекселек тауарының бөтә йүнәлештәре буйынса ла аҙыҡ-түлек хәүефһеҙлеген тәьмин иткән. Был турала Хөкүмәттә үткән оператив кәңәшмәлә вице-премьер – ауыл хужалығы министры Илшат Фәзрахманов белдерҙе.

Бөгөнгә ҡарата баҫыуҙарҙың 91 процентынан - 1 миллион 636 мең гектарҙан уңыш йыйып алынған. Бөтәһе 3,7 миллион тонна иген һуғылған. Республиканың мохтажлығы – 2,7 миллион тонна. Тимәк, бер миллиондан ашыу тонна һатыуға тороп ҡала.

– Бөгөндән Силәбе өлкәһе һәм Удмурт республикаһы беҙҙең менән контракттар төҙөй. Уларҙа уңыш яҡшынан түгел, – тине Илшат Фәзрахманов.

Үткән аҙнала шәкәр сөгөлдөрөн йыйыу башланған. Уның уртаса уңыш кимәле гектарынан 331 центнер. Яҡынса мәғлүмәттәр буйынса, быйыл 180-190 мең тонна шәкәр алыныр тип көтөлә. Республиканың мохтажлығы – 91 мең тонна.

Мал аҙығы әҙерләү эше лә тамамлана: быйыл 1,5 йылға етерлек аҙыҡ тупланған. Ә бына майлы культураларҙың уңышы хөртөрәк: гектарынан 10 центнер тирәһе. Был культураларҙы йыйыу күптән түгел генә башланды, әле дөйөм майҙандың 16 процентынан уңыш йыйылған.

Фото: gtrk.tv