+20 °С
Болотло
Иҡтисад
13 Ноябрь 2020, 20:30
1 декабргә тиклем түләп өлгөрөгөҙ
Һалымды түләмәгән йәки тулыһынса ҡапламаған осраҡта, гражданға ҡарата ниндәй саралар ҡулланылыуы ихтимал?
Милеккә, ергә, транспортҡа һәм, һалым агенты кешеләрҙең килеменә һалымды тотоп алып ҡалмаған осраҡта, уға һалымды түләү мотлаҡ. Уны ҡапламаған йәки тулыһынса түләмәгән осраҡта, Рәсәй Һалым кодексының 122-се статьяһына ярашлы, яуаплылыҡ ҡаралған.
Был осраҡта һалым органы һалымды һәм пеняны түләү кәрәклеге хаҡында иҫкәрмә ебәрә. Әгәр ошо талап та үтәлмәһә, тейешле ҡарар суд органдарына тапшырыла. Ошо нигеҙҙә һалым бурыслының килеменән тотоп алып ҡалына йә суд приставтары хеҙмәте тарафынан түләттерелә. Улар шулай уҡ төрлө сикләү сараларын тормошҡа ашыра ала. Мәҫәлән, бурыслының банк картаһын "бикләүҙәре", шулай уҡ мөлкәтенә арест һалыуҙары ихтимал.
Был бурыс хаҡында йәшәгән урын буйынса һалым инспекцияһына барып белергә мөмкин. Бынан тыш, “Һалым түләүсенең шәхси кабинеты” йәки “Һалымдарҙы түлә” сервистары ярҙамында онлайн тәртибендә түләү юлы бар. Улар Федераль һалым хеҙмәтенең сайтында (nalog.ru) урынлашҡан. Шәхси кабинетҡа теркәү картаһындағы логин һәм пароль ярҙамында инергә мөмкин. Ә уны йәшәү урыны буйынса ғына түгел, Рәсәй Федераль һалым хеҙмәтенең һәр хеҙмәтендә алырға була. Бының өсөн үҙең менән шәхесте раҫлаған документтың, шәхесте иҫәпкә ҡуйыу буйынса таныҡлыҡтың (ИНН) төп нөсхәһе йәки күсермәһе булыуы кәрәк.
Һалым буйынса бурыстар хаҡында Берҙәм дәүләт һәм муниципаль порталында ла (www.gosuslugi.ru) белешмә алырға мөмкин. Бынан тыш, Рәсәйҙең Федераль суд приставтары хеҙмәтенең сайтында ла башҡарыу производствоһы буйынса мәғлүмәттәр банкы бар. Иң мөһиме – 1 декабргә тиклем өлгөрөгөҙ.
Фото: kto-chto-gde.ru
