Был аҙна тәҡдимдәргә бай булды

Форумдың беренсе сессияһы “Белемде экспортлау: инфраструктур һәм һанлы ҡарарҙар, сит илдәрҙәге ярҙам һәм алға барыу ысулдары” тип аталһа, артабан сарала ҡатнашыусылар “ШОС һәм БРИКС илдәренең берҙәм эшмә­кәрлек майҙаны. Эшлекле даирәләрҙең хеҙмәттәшлеге” тигән сессияла шөғөл­ләнде.

Халыҡ-ара эшҡыуарлыҡ аҙналығы – төрлө илдәрҙең төбәк һәм федераль властары вәкилдәрен, эксперттар һәм эшҡыуарҙарҙы берләштереүсе ваҡиға. Аҙна “гибрид” форматында – онлайн һәм офлайн режимдарында – үтте, йәғни спикерҙарҙың бер өлөшө сара майҙансығында йыйылһа, ҡалғандары әңгәмәгә конференц-элемтә аша ҡушылды. Программа үҙ эсенә бәләкәй һәм урта эшҡыуарлыҡ, туризм һәм экспорт темаларын алды. Һөйләшеү барышында пандемиянан һуңғы осорҙа эшҡыуарҙарға ярҙам итеүҙең яңы механизмдары буйынса тәҡдимдәр күп булды.

– Коронавирус барыһынан да би­герәк бәләкәй һәм урта эшҡыуарлыҡҡа зыян килтерә, шуға күрә был даирәгә ярҙам итеү өҫтөнлөклө бурысыбыҙ булып тора, – тине республика Башлығы Радий Хәбиров, сарала ҡатнашыусылар алдында тәбрикләү һүҙе менән сығыш яһап.

Республика етәксеһе сараның “Глобаль талаптарға яуап биреүҙә хеҙмәттәшлек иҡтисады” тигән пленар ултырышында доклад менән дә сығыш яһаны, ә форум аҙағында ул журна­листарҙың һорауҙарына яуап бирҙе.

– Беҙҙең өсөн төп үҫеш нөктә­ләренең береһе – тышҡы иҡтисади эшмәкәрлек, – тине Радий Фәрит улы. – Беҙҙең республика электән был эштә әүҙем, нефть химияһы тармағы про­дук­цияһына, мәҫәлән, донъя баҙа­рында ихтыяж ҙур. Ләкин иҡтисадты диферсификациялау тураһында ла уйларға кәрәк, машина эшләү, ауыл хужалығы һәм башҡа тармаҡтарҙың продук­цияһына ла һатып алыусылар кәрәк. Беҙ был йүнәлештә лә эшләйбеҙ. Венала һәм Истанбулда вәкиллектәр бар, Ҡаҙағстанда асырға йыйынабыҙ. Ундағы вәкилдәребеҙ был илдәрҙәге күҙ-ҡолаҡтарыбыҙ булырға, урындағы эшҡыуарҙарға беҙҙең ниндәй тауар етештереүебеҙҙе һәм тәҡдим­дәребеҙҙе еткереп торорға тейеш.