Яңылыҡҡа башлап юл яралар

Октябрьский энергетиктарын төрҙәштәренән айырмалы иткән үҙенсәлеген айырып билдәләү урынлы – улар башҡаларҙан бер аҙым алдараҡ барырға ынтыла һәм тармаҡтағы техник һәм технологик яңылыҡтарға башлап юл яра. Предприятиеның эш­мәкәр­леге менән яҡындан танышырға булдыҡ.

Предприятиеға электр энер­гия­һы менән тәьмин итеү сис­темаһын эксплуатациялау, улар­ҙың техник торошон яҡшыртыу һәм ҡоралландырыу, яңыртыу бурысы йөкмәтелгән. Шулай уҡ электр объекттарын һәм сел­тәрҙәрҙе хеҙмәтләндереү, ҡул­ланыусыларға килешеү нигеҙендә хеҙмәттәр күрһәтеү, электр энергияһын һаҡсыл тотоноу сараларын ғәмәлгә ашырыу, электр объекттары һәм коммуникацияларын төҙөү, электр тәьмин итеү селтәрҙәрен проектлау уларҙың эш даирәһенә инә. Пред­приятиеның ойоштороу структу­раһының нигеҙен административ-идара итеү аппараты, төп һәм ярҙамсы производство, электр энергияһын ҡулланыусыға тапшырыу буйынса подразделениелар тәшкил итә.

Предприятиеның үҙ ҡарама­ғын­дағы һәм арендалауында 273 трансформатор ярҙамсы стан­ция­һы, 442 трансформатор, 337,8 километр кабель һәм 468,78 километр һауа линиялары иҫәпләнә. Улар ҡулланыу­сыларҙың 80-гә яҡын, шул иҫәптән 54 трансформатор ярҙамсы станцияһын техник хеҙмәтләндерә. Компания быйыл туғыҙ айҙа 188 объектты – күп фатирлы торлаҡ йорттарҙы, сауҙа, бәләкәй һәм урта эшҡыуарлыҡ объекттарын, төҙөлөш майҙандарын, производство базаларын электр селтәрҙәренә тоташтырған. Технологик тоташтырыуҙың уртаса срогы 38,9 көн тәшкил иткән.

Предприятие коллективы алға ҡуйған бурыстарҙы үҙенең ҡеүәтле потенциалына нигеҙ­ләнеп һәм донъя күләмендәге алдынғы ҡаҙаныштарҙы ҡулла­нып тормошҡа ашыра. Тармаҡ­тағы техник һәм технологик яңылыҡтарға йыш ҡына Октябрьский энергетиктары башлап юл аса. Улар республикала беренсе булып эштәрҙе көсөр­гәнеш аҫтында эшләү алымы (РПН) менән башҡарыуҙы үҙләш­тергән. Яңы алым, сел­тәрҙәрҙә ҡаралған режимды үҙгәртмәйенсә, ҡул­ланыу­сыларҙы өҙмәйенсә һәм электр энергияһы һатыуҙы арттырып, ремонт-эксплуатациялау эш­тәренең һығылмалылығын булдырып, хәүефһеҙ эшләүҙе тәьмин итә. РПН технология­һының асылы белгестең зиһенен эш хәүефһеҙлеге ҡағиҙәһе менән уның технологияһы берләште­релгән заданиеға йүнәлтеүгә нигеҙләнә. Яңы эш алымы энергия ағымын оптималь булмаған бүлеү сәбәпле, селтәрҙәрҙәге юғалтыу сы­ғымдарына, етешһеҙ­лекте үҙ ваҡытында хәл итмәү сәбәпле һауа һәм кабель линия­ларының туҡталыуына, электр энергияһын реализациялауҙың кәмеүенә юл ҡалдырмай. Был осраҡта эш урынын әҙерләү менән бәйле үткәргесте өҙөү, ергә тоташтырыу кеүек эш этаптарын башҡарыу кәрәкмәй. Ә бит һауа һәм кабель линияларын өҙөп тороу электр менән тәьмин итеүҙең ышаныслылығын кәметеүгә килтерә. Яңылыҡ электр биреү­ҙәге сикләүҙәр һәм электр менән тәьмин итеүҙәге өҙөклөктәр һөҙөмтәһендәге юғалтыуҙарҙы кәметә.

Быйылғы хеҙмәт йылы тамам­ланыуға бара. Энергетиктар башҡарылған эштәрҙе барлай. Быйыл көсөргәнешле трансфор­маторҙарҙы капиталь ремонтлау, электр ҡоролмаларын тепловизион тикшереү, РЗиА сараларын ревизиялау һәм көйләү, һауа һәм кабель линияларын капиталь ремонтлау, профилактик һынауҙар буйынса ҙур эш башҡарылған. Инвестиция прог­раммаһы буйынса предприя­тиеның үҙ көсө менән барлыҡ трансформатор ярҙамсы станцияларын мәғлүмәттәрҙе автоматик тапшырыусы электр счетчиктары менән йыһазлан­дырыу теүәлләнгән. Һөҙөмтәлә һәр ярҙамсы станция буйынса электр энергияһының актуаль параметрҙары тураһында мәғлү­мәт алырға, электр энергияһын юғалтыуға килтергән биләмә­ләрҙе локалләштерергә, предприятие селтәренә килгән һәм ҡулла­ныусыға ебәрелгән электр энергияһы балансын контролдә тоторға мөмкинлек тыуған.

“Энергосфера” программалы комплексын керетеү ҙә компания эшмәкәрлегендә мөһим яңылыҡ булып тора. Был йүнәлештә лә эш башланған. Уның ярҙамында электр энергияһы сығымдары һәм урынлаштырылған счетчик­тарҙан электр энергияһы параметрҙары хаҡында мәғлүмәт туплап һәм анализлап буласаҡ. Артабан ул ҡулланыусыларға үҙҙәренең “аҡыллы” электр счет­чиктарындағы мәғлүмәткә инергә мөмкинлек бирәсәк. Бындай счетчиктар 2022 йылда урынлаштырыла.

Шул уҡ программа нигеҙендә быйыл ҡаланың күп фатирлы йорттарын дөйөм йорт электр счетчиктары менән йыһазлан­дырыуҙы теүәлләгәндәр. Һуңғы йылдарҙа компанияла предприятие менән автоматлаштырылған идара итеү системаһын булдырыу буйынса әүҙем эш бара. Ул производство процестарын комплекслы автоматлаштырыу һәм компьютерлаштырыуҙы күҙ уңын­да тота.

Үткән йылда клиенттарҙың селтәр компанияһы менән арала­шыуының бөтә этаптарында ла ҡатнашыу өсөн ҡулланыу­сыларҙы хеҙмәтләндереү үҙәге асылған. Бында клиенттарға белгестәр квалификациялы консультация бирә, физик һәм юридик шәхестәрҙе хеҙмәтләнде­рәләр. Офиста клиенттар өсөн уңайлы шарттар тыуҙырылған.

Энергетика – заман техно­логия­ларының һуңғы ҡаҙаныш­тарына нигеҙләнеп айырыуса етеҙ үҫеш алған сәнәғәт тармағы. Октябрьский энергетиктары замандан бер аҙым алдараҡ бара һәм технологик яңылыҡтарҙы башлап үҙләштерә. Уларҙың республикала һәм Рәсәй энергетика комплексы тармағында танытҡан эштәре, уртаҡлашыр тәжрибә­ләре бар.

Октябрьский ҡалаһы.