+20 °С
Болотло
Иҡтисад
15 Март 2021, 09:45
Республика бюджетына килем кәмегән
Быйыл ғинуарҙа Башҡортостандың консолидацияланған бюджетына һалым һәм һалым булмаған килем 16,3 миллиард һум тәшкил иткән.
Быйыл ғинуарҙа Башҡортостандың консолидацияланған бюджетына һалым һәм һалым булмаған килем 16,3 миллиард һум тәшкил иткән. Был, былтырғы ошо уҡ осор менән сағыштырғанда, 17 процентҡа кәмерәк. Ошо хаҡта республика Хөкүмәте Премьер-министры Андрей Назаров белдерҙе.
“2021 йыл Башҡортостандың консолидацияланған бюджетына һалым һәм һалым булмаған килем килеүенең кире динамикаһынан башланды. Килемдең кәмеүе һиҙелерлек дәрәжәлә табыштың кәмеүе менән бәйле: нефть продукттарына акциздарҙың – 20,2 процентҡа, ойошмаларҙың килеменә – 26,4 процентҡа, физик шәхестәрҙең килеменә – 3,3 процентҡа”, – тип белдерҙе Андрей Назаров Башҡортостан бюджетына һәм республика муниципаль берекмәләре бюджетына һалым һәм һалым булмаған килем килеүе, килем ҡеүәтен үҫтереү мәсьәләләре буйынса ведомство-ара комиссияһы кәңәшмәһе барышында. Шулай уҡ ойошмаларҙың милкенә булған килем (13,6 тапҡырға), милекте файҙаланыуҙан (ике тапҡырға) килгән аҡса ла кәмегән.
– Һалым килемен кәметеү эҙемтәләрен һөҙөмтәле бөтөрөү өсөн көс һалабыҙ. 2020 йылда иҡтисадҡа инвестициялар үҫеше тиҙлеге 100,9 процентҡа етте – яңы инвесторҙар аҙаҡҡы һөҙөмтәлә төбәктә һалым килеме күләмен арттырасаҡ, – тине Андрей Назаров.
2021 йылдың 1 ғинуарына ҡарата Башҡортостандың консолидацияланған бюджетына һалым һәм һалым булмаған килем буйынса дөйөм бурыс 13,5 миллиард һум, шул иҫәптән республика бюджетына – 7,6 миллиард һум, урындағы бюджетҡа 5,9 миллиард һум тәшкил иткән.
Фото: республика Хөкүмәте.
