+30 °С
Болотло
Иҡтисад
8 Апрель 2021, 15:25
Роботлаштырыу - беҙҙең яҡын киләсәк
Хөкүмәт робот техникаһы тармағында техника-индереү тибындағы махсус иҡтисади биләмә булдырырға йыйына.
Башҡортостан Хөкүмәте төбәктә роботлаштырыуға булышлыҡ итергә һәм робот техникаһы тармағында техника-индереү тибындағы махсус иҡтисади биләмә булдырырға йыйына. Был турала бөгөн Өфөлә үткән Рәсәй сәнәғәт форумы барышында Хөкүмәт Премьер-министры Андрей Назаров хәбәр итте.
"Бөгөн роботлаштырыу сәнәғәт тармағын ғына түгел, ә, мәҫәлән, агросәнәғәт тармағын да үҙ эсенә ала. Республикала күптән автоматлаштырылған һөт фермалары эшләй. Беҙ шулай уҡ автомобилдәр йыуыу өсөн роботлаштырылған комплекстар булдыра башланыҡ", - тине Андрей Назаров.
Уның белдереүенсә, етештереү кластерҙарын системалы үҫтереү - төбәк сәнәғәтенең өҫтөнлөклө йүнәлеше. Башҡортостанда бөгөндән биш ТОСЭР һәм “Алға” махсус иҡтисади биләмәһе эшләй.
"Республикала робот техникаһы тармағында техника-индереү тибындағы махсус иҡтисади биләмә булдырыу планы бар. Шуныһын да билдәләргә кәрәк: иҡтисадты һөҙөмтәле, тотороҡло үҫтереү, инвестиция мөхитен яҡшыртыу өсөн яңы етештереүҙәрҙе үҫтереү генә етмәй, традицион тармаҡтарҙың технологик кимәлен дә күтәрергә кәрәк", - тине Андрей Назаров.
Һанлаштырыу һәм “аҡыллы” роботлаштырыу процестары әленән авиация тармағында бар. Улар һәр ваҡыт технологик процестың башында тора. Мәҫәлән, республикала пилотһыҙ осоу аппараттарын үҫтереү һәм етештереү планы бар.
Фото: Башҡортостан Хөкүмәте сайты.
