Ялан батырҙары ең һыҙғанды

“Урал” ауыл хужалығы етештереү кооперативы төбәктә үҫемлекселектә лә, малсылыҡта ла һынатмай. Хужа­лыҡта өс – Мораҙым, Ҡушкүл һәм Михайловка ауылдарынан кешеләр эшләй.

– Бөгөн арышты өҫтәмә туҡлан­ды­рыуға төштөк, бынан тыш ҡайһы бер ба­ҫыуҙарҙа дым ҡаплайбыҙ, тырма­тыуҙы ла бергә алып барабыҙ, – тип һөйөнөсө менән уртаҡлаша “Урал” ауыл хужалығы етештереү кооперативы рәйе­се Рәмил Иштуғанов. – Ә инде көндәр йылыныу менән сәсеүгә лә тотона­саҡбыҙ. Ужым бойҙайы шул хәтлем матур ҡышлаған, алыҫтан уҡ йәм-йәшел булып күренеүенә күңел ҡыуана.

“Урал”дар быйыл 1 300 гектар майҙанда сәсеү эштәрен башҡарырға тейеш. Һауа торошо матур торған осраҡта уңғандар тиҙ арала яҙғы баҫыу эштәрен тамамларға йыйына. Быйыл хужалыҡ етәкселеге ергә мөмкин тиклем күберәк ашлама индерергә ниәт иткән.

Рәмил Таһир улы билдәләүенсә, егәрлеләрҙе яланда тәүлегенә ике тапҡыр ашатыу ойошторолған, трактор йәки машина боҙолған осраҡта, ремонт эштәре лә ҡырҙа башҡарыла. Техника тигәндән, уның яңы булыуы һәр йәһәттән дә отошло. Бында һуңғы йылдарҙа автопаркты ярайһы яңыртҡандар. Кадрҙарға ла иғтибар көслө. Етәксе йәш баш агроном Сынтимер Иҫәнбаевҡа ҙур өмөттәр бағлай, улар бер-береһен ярты ҡараштан аңлай. Әйткәндәй, бынан бер нисә йыл элек хужалыҡта баш инженер булып эш башлаған шулай уҡ йәш белгес Илнар Лоҡманов, дәүләт программаһына инеп, ҙур ярҙам алған. Василий Баландин, Иван Степаненко, Хәмзә Смаҡов, Филүс Байышев, Фәнил Бикмөхәмәтов һәм башҡалар ҙа тәүлектең һәр сәғәтен файҙаланып ҡалырға тырыша.

– Хеҙмәткәрҙәрҙең һәр береһе бурысын теүәл үтәй, берәү ҙә илке-һалҡы йөрөмәй, – ти Рәмил Таһир улы. – Уларҙың барыһына ла рәхмәттән башҡа һүҙем юҡ. Кем-кем, ә “Урал” хужалығы артта ҡалмаҫ инде, һәр саҡ алдынғы булдыҡ, киләсәктә лә һынатмаясаҡбыҙ.

Ялан батырҙары иген культураларын сәсеп бөтөү менән шунда уҡ техник культураларға тотонасаҡ.

Ауырғазы районы.