Еңел машиналарға хаҡ артырмы?

– “Автостат” агентлығы хәбәр итеүенсә, сит илдәрҙә сығарылған машиналарға хаҡ күтәрелә. Белгестәр әйтеүенсә, был утилләштереү йыйымдарының артыуына бәйле икән. Әлеге ваҡытта ил Хөкүмәте һуңғы документтарҙы әҙерләй, тип хәбәр итә “Автостат” агентлығы хеҙмәткәрҙәре.

Был йыйымдар 25 процентҡа артыр, тип көтөлә. Ошо хаҡтағы закон проекты килешеүҙең һәм экспертиза үткәреүҙең һуңғы стадияһын үтә. Әммә был үҙгәрештәр Рәсәйҙә йыйылған автомобилдәргә ҡағыл­маясаҡ, тип ышандыра түрәләр. Ә бына сит ил машиналарына килгәндә, улар тағы ҡиммәтләнер, моғайын. Йыйымдарҙан тупланған аҡса иһә автокредит, лизинг буйынса ташламаларға һәм газ яғыулығын ҡулланыусыларға льготаларға йүнәлте­ләсәк.

Тағы шуны билдәләргә кәрәк: былтыр декабрҙә матур йолаға әүерелгән Яңы йыл алды еңел автомобилдәр сауҙаһы әүҙем барманы. Шуға үткән йыл моделдәре машиналары өсөн ташламалар көтөлмәй. Быға, белгестәр белдереүенсә, автоба­ҙарҙағы дефицит сәбәпсе икән. Коронавирус пандемияһы арҡаһында автомо­билдәрҙе етештереүҙә тотҡарлыҡтар теркәлгән. Өҫтәүенә, үткән йылдың һуңғы айҙарында һумдың осһоҙланыуы һөҙөм­тәһендә машиналарға ихтыяж кинәт артҡан. Әммә был баҙарҙағы хәлдәр яҙ тотороҡланыр тип көтөлә, сөнки яңы ҡыйбат хаҡҡа һатылған машиналарға ихтыяж да кәмейәсәк.

Һәммәбеҙ шаһит булыуынса, һуңғы йылдарҙа техникаға хаҡ бермә-бер арта. Ошо уҡ хәл былтыр ҙа күҙәтелде һәм быйыл да иҫкәрмә булмаясаҡ. Өҫтәүенә, күптәр хәҙер автомобилде капитал һалыу сығанағы итеп тә ҡарай. Бынан тыш, хәҙер машина – ниндәйҙер байлыҡ билдәһе түгел, ә уңайлы транспорт сараһы.