Ампуланы ватҡан өсөн төрмәгә ултыртмаясаҡтар

Дәүләт Думаһы Рәсәй Енәйәт кодексының228-се статьяһына үҙгәрештәр индереү тураһында закон ҡабул итте. Һүҙ бында һаҡһыҙлыҡ буйынса наркотик саралар һәм психотроп матдәләр әйләнеше ҡағиҙәләрен боҙған медицина хеҙмәткәрҙәрен енәйәт яуаплылығынан азат итеү тураһында бара. 

Яңы нормалар Башҡортостан медицина хеҙмәткәрҙәренә лә ҡағыла. Һәр осраҡты ведомство-ара комиссиялар тикшерәсәк, уларҙың эшмә­кәрлеген Һаулыҡ һаҡлау һәм Эске эштәр ми­нистрлыҡтары медицина бер­ләшмәһе вәкилдәре менән берлектә көйләйәсәк. Был үҙгә­рештәр һаҡһыҙлыҡ арҡаһында наркотик һәм психотроп мат­дәләр әйләнеше ҡағиҙәләрен боҙған табип­тарға, башҡа медицина хеҙмәткәр­ҙәренә ҡарата енәйәт закондарын гуманлаш­тырыуға йүнәл­телгән. Мәҫәлән, осраҡлы рәүештә наркотиклы йәки психотроп матдәле ампуланы ватҡан, иҫәпләгәндә хаталанған, яңылышлыҡ менән ташыу һәм һаҡлау ҡағиҙәләрен боҙған хәлдәр күҙ уңында тотола.

Был законға тиклем көслө тәьҫир итеүсе матдәләр әйлә­неше ҡағиҙә­ләрен боҙған өсөн өс йылға тиклем иректән мәхрүм итеү ҡарала ине. Эштән бушатылыу, осраҡлы хата ебәреү хәүефе табиптарҙы эҙәрләп килде, бындай препараттарҙы пациент­тарға яҙып биреү хеҙмәт­кәрҙәрҙә йыш ҡына ҡурҡыу тойғоһо тыуҙырҙы. 

“Хәҙер енәйәт яуаплылығы бөтө­рөлдө, әммә индерелгән үҙгәрештәр наркотик сараларҙы һәм психотроп матдәләрҙе юғалтҡан өсөн дисциплинар йәки матди яуаплылыҡтан ҡотҡар­май”, – тине Дәүләт Думаһы депутаты Рафаэль Мәрҙәншин.

Динә АРЫҪЛАНОВА әҙерләне.