“Һәр самолетта беҙҙең өлөш бар”

“МАКС-2021” халыҡ-ара авиация-йыһан салонында Башҡортостан Башлығы Радий Хәбиров “Ростех” дәүләт корпорацияһына ингән Берләштерелгән двигателдәр эшләү корпорацияһының ҡаҙаныштары менән танышты.

 Улар иҫәбендә – ВК-650В двигате­ленең күргәҙмә өлгөһө. Уның комплектлау өлөштәрен Өфөнөң “ОДК-УМПО” асыҡ акционерҙар йәмғиәте сығара. Перспективалы двигатель еңел класлы Ка-226Т, “Ансат”, VRT500 Рәсәй вертолеттарында һәм ошондай уҡ класлы сит ил осҡостарында файҙаланыу өсөн тәғәйенләнә. Ул киң тармаҡ кооперация­һында сығарыла. Мәҫәлән, “ВИАМ” федераль дәүләт унитар предприятиеһы турбиналарҙағы сопло аппараттарының, күсмә каналдарҙың һәм башҡа узелдарҙың ҡатлаулы әҙерләмәләрен етештергән. Берләштерелгән двигателдәр эшләү кооперацияһы предприятиелары, шул иҫәптән “ОДК-УМПО” йәмғиәте “ВИАМ”дың әҙерләмәләренән деталдәр һәм узелдар эшләгән. Әле Өфө мотор эшләүселәре киләсәктә двигатель деталдәрен етештереүҙе тулыһынса үҙләштереү өсөн ошо әҙерләмәләрҙе иретеп йәбештереү технологияһын ғәмәлгә индерә.

Ҡаҙаныштар араһында ПД-8 перспективалы газ турбиналы авиадвигателе лә бар.

– Уның концепцияһына һалынған юғары күрһәткестәр, экологик үҙенсәлектәр баҙарҙа яңы двигателдең көнәркәшлек ҡеүәһен тәьмин итәсәк, – тине “ОДК-Климов” акционерҙар йәмғиәтенең генераль конструкторы Всеволод Елисеев. – Беҙ газ генераторының тәүге өлгөһөн сығарҙыҡ. Ул инженерлыҡ һынауҙарының тәүге этабын уңышлы үтте. Артабан сертификация һынауын тотоу өсөн двигателдең тәжрибә өлгөләрен йыйыу бурысы тора.

– Яңы проекттарҙың барыһын да корпорациябыҙ предприятиеларының мөмкинлектәрен киң файҙаланып тормошҡа ашырабыҙ, – тип белдерҙе “ОДК” йәмғиәтенең генераль директоры Александр Артюхов. – Мәҫәлән, “ОДК-УМПО” яңы эшләнмәләрҙе комплект­лауҙа 30-40 процентҡа ҡатнаша.

Республика Башлығы Радий Хәбиров “МАКС” салонында шулай уҡ “Ростех” составына ингән “Технодинамика” акционерҙар йәмғиәте стендын ҡарап сыҡты. Холдингка республиканың өс предприятиеһы инә: Өфө агрегат етештереү берекмәһе, “Гидравлика” агрегат предприятиеһы һәм “Молния” фәнни-етештереү предприятиеһы. Төбәк етәксеһе “Технодинамика” етәкселеге менән производствоны үҙгәртеп ҡороу, авиация-йыһан тармағы өсөн продукция сығарыуҙы арттырыу мөмкинлектәре буйынса фекер алышты.

– Башҡортостанда авиация төҙөлөшө  “ОДК-УМПО” һәм Күмертау авиация предприятиеһы ғына түгел. “Ростех” дәүләт корпорацияһына Башҡорт­остандан һигеҙ предприятие инә. Шуға күрә “МАКС-2021” авиасалонында күрһәтелгән һәр самолетта тиерлек беҙҙең төбәктә эшләнгән деталь йәки узел бар, – тине Радий Хәбиров. – Был – ҙур ғорурлыҡ.

- Лилиә ДӘҮЛӘТБӘКОВА.