Башҡортостандағы “Благовещен” йылдам социаль-иҡтисади үҫеш биләмәһендә яңы резидент – "БАШТРАНСФЛОТ" яуаплылығы сикләнгән йәмғиәте – теркәлде. Ул 300 тоннаға тиклем һыйҙырышлы судноларҙы күтәреү-төшөрөүгә тәғәйенләнгән “Кессон-200” ҡорамалын ремонтлау һәм яңыртыу буйынса инвестиция проектын тормошҡа ашырырға ниәтләнә. Һөҙөмтәлә компания судноларҙы ремонтлау һәм төҙөү өлкәһендә хеҙмәттәр тәҡдим итә аласаҡ, был республикала йылға транспортын үҫтереүгә булышлыҡ итәсәк.
– Йылдам социаль-иҡтисади үҫеш биләмәһе төбәккә инвестиция йәлеп итеү мөмкинлектәрен арттыра. Инвесторҙарҙың яңынан-яңы проекттарға тотоноуы һәм өҫтәмә инвестициялар йәлеп итеүе Башҡортостандың бизнес алып барыу өсөн уңайлы төбәк булыуы тураһында һөйләй. "БАШТРАНСФЛОТ" яуаплылығы сикләнгән йәмғиәте судноларҙы сифатлы ремонтлаясаҡ, ә был республикала һәм Рәсәйҙең башҡа төбәктәрендә йылға транспортының үҫешенә ыңғай йоғонто яһаясаҡ. Дөйөм инвестиция күләме 22,7 миллион һум тәшкил итәсәк, 110 эш урыны булдырыласаҡ, – тип һөйләне республиканың иҡтисади үҫеш һәм инвестиция сәйәсәте министры урынбаҫары Екатерина Кликунова.
Проектты 2021-2028 йылдарҙа тормошҡа ашырыу ҡаралған. Быйыл төҙөлөш-монтаж эштәре үткәреләсәк, ҡорамалдар һатып алынасаҡ.
Белешмә:
Благовещен ҡалаһы – күп профилле муниципаль берәмек. Ундағы төп предприятиеларҙың береһе – “Благовещен арматура заводы” акционерҙар йәмғиәте. Ҡалала йылдам социаль-иҡтисади үҫеш биләмәһе 2019 йылдың 12 февралендә булдырылғайны.
Әлеге мәлдә "Благовещен" йылдам социаль-иҡтисади үҫеш биләмәһе резеденттары реестрына 18 компания индерелгән, 15,6 миллиард һум инвестиция һалыу һәм 1529 эш урыны булдырыу ҡаралған. Дөйөм Башҡортостанды алғанда, йылдам социаль-иҡтисади үҫеш биләмәләрендә 87 резидент теркәлгән.
Фото: БР Хөкүмәтенең рәсми сайтынан.